ہنگری کے وزیراعظم میخائل گورباچوف کی آخری رسومات میں شرکت کے لئے ماسکو پہنچ گئے
ماسکو: اشتیاق ہمدانی
ہنگری کے وزیراعظم وکٹر اوربان سوویت یونین کے پہلے اور واحد صدر میخائل گورباچوف کی الوداعی تقریب میں شرکت کے لئے ماسکو پہنچے ہیں۔ یہ الوداعی تقریب وسطی ماسکو میں ہاؤس آف یونینز کے ستون ہال میں ہو رہی ہے۔ اے ایف پی نے اس سے قبل ہنگری کی حکومت کا حوالہ دیتے ہوئے اطلاع دی تھی کہ اوربان اس تقریب میں ہنگری کے وفد کے طور پر شرکت کریں گے۔ کریملن کے ترجمان دیمتری پیسکوف نے قبل ازیں کہا تھا کہ اوربان اور روسی صدر ولادیمیر پوتن کے درمیان کسی ملاقات کا منصوبہ نہیں ہے۔
یاد رہے سوویت یونین کے پہلے اور واحد صدر میخائل گورباچوف کا 30 اگست کو 91 سال کی عمر میں انتقال ہو گیا تھا۔ گورباچوف چھ سال تک سوویت صدارتی عہدے پر فائز رہے۔ اس روسی سیاستدان نے 1985 میں کمیونسٹ پارٹی کی مرکزی کمیٹی کے سیکرٹری جنرل کے طور پر اپنی تقرری کے تقریباً فوراً بعد ایک نئے کورس کا اعلان کیا، جس کے بعد وہ سوویت یونین کے سپریم سوویت کے سربراہ بن گئے. گورباچوف نے صدر کا عہدہ قائم کرنے کی تجویز پیش کی اور پارٹی کے قائدانہ کردار سے متعلق آئینی آرٹیکل کو ختم کر دیا۔ گورباچوف نے 25 دسمبر 1991 کو سوویت یونین کے صدر کے عہدے سے استعفیٰ دے دیا اور اس کے ساتھ ہی یو ایس ایس آر کا خاتمہ ہوا۔