ہومتازہ ترینپاکستانی بیٹنگ لائن ریت کی دیوار ثابت ہوئی، پرتھ ٹیسٹ میں پاکستان...

پاکستانی بیٹنگ لائن ریت کی دیوار ثابت ہوئی، پرتھ ٹیسٹ میں پاکستان کو شکست

2523

December 17, 2023

ماسکو (صداۓ روس)
پرتھ ٹیسٹ میچ کے چوتھے روز آسٹریلیا نے پاکستان کو ٣٦٠ رنز سے شکست دے دی۔ آسٹریلیا نے آج اپنی دوسری اننگز ٢٣٣ رنز ٥ کھلاڑی آؤٹ پر ڈیکلیئر کردی تھی جس کے بعد پاکستان کو جیت کے لیے ٤٥٠ رنز کا ہدف ملا تھا اور پوری ٹیم ٨٩ رنز بنا کر آؤٹ ہوگئی۔ دوسری اننگز اور ہدف کے تعاقب کے آغاز میں پاکستان کی پہلی وکٹ ٢ رنز پر گری جب عبداللّٰہ شفیق ٢ رنز بناکر آؤٹ ہوئے جس کے بعد قومی ٹیم کی دوسری وکٹ ١٧ رنز پر گری جب شان مسعود کو ٢ رنز پر جوش ہیزل ووڈ نے کیچ آؤٹ کرایا۔ پاکستان کی تیسری وکٹ ١٩ رنز پر گری، اس مرتبہ امام الحق ١٠ رنز پر ایل بی ڈبلیو آؤٹ ہوئے۔

پاکستان کی چوتھی وکٹ ٤٨ رنز پر گری جب بابر اعظم ١٤ رنز بنا کر کیچ آؤٹ ہوئے جبکہ پانچویں وکٹ ٥٦ رنز پر گری جب سرفراز احمد ٤ رنز بنا کر کیچ آؤٹ ہوئے۔

قومی ٹیم کی چھٹی وکٹ ٦٣ رنز پر گری جب آغا سلمان ٥ رنز بنا کر رن آؤٹ ہوئے۔ پاکستان کی ساتویں وکٹ ٧٩ اور آٹھویں وکٹ ٨٣ رنز پر گری۔ فہیم اشرف ٥ رنز پر ایل بی ڈبلیو اور عامر جمال ٤ رنز پر بولڈ ہوئے۔ دونوں بیٹرز کو آسٹریلوی اسپن بولر نیتھن لائن نے آؤٹ کیا۔ پاکستان کی نویں وکٹ ٨٩ رنز پر گری جب سعود شکیل ٢٤ رنز بنا کر ایل بی ڈبلیو آؤٹ ہوئے۔ پاکستان کی آخری وکٹ ٨٩ رنز پر گری، خرم شہزاد صفر پر آؤٹ ہوئے۔ آسٹریلوی ٹیم کے آل راؤنڈر مچل مارش کو پلیئر آف دی میچ کا ایوارڈ دیا گیا۔ اس سے قبل ٹیسٹ میچ کے چوتھے دن دوسرے سیشن میں آسٹریلیا نے اپنی دوسری اننگز ٢٣٣ رنز ٥ کھلاڑی آؤٹ پر ڈیکلیئر کردی تھی جس کے بعد پاکستان کو جیت کے لیے ٤٥٠ رنز کا ہدف ملا تھا۔

چوتھے دن آسٹریلیا نے اپنی نامکمل دوسری اننگز کا آغاز ٢ وکٹ کے نقصان پر ٨٤ رنز سے کیا۔ آسٹریلوی بیٹر اسٹیون اسمتھ ٤٣ اور عثمان خواجہ نے ٣٤ رنز کے ساتھ دوبارہ کھیلنا شروع کیا تو کچھ ہی دیر میں فاسٹ بولر خرم شہزاد نے ٨٧ رنز پر پاکستان کے لیے تیسری وکٹ حاصل کر لی۔

خرم شہزاد نے ٤٥ رنز پر اسٹیون اسمتھ کو ایل بی ڈبلیو آؤٹ کیا۔ آسٹریلیا کی چوتھی وکٹ ١٠٧ رنز پر گری جب ٹریوس ہیڈ ١٤ رنز بنا کر عامر جمال کی گیند پر کیچ آؤٹ ہوئے۔ آسٹریلیا کی پانچویں وکٹ ٢٣٣ رنز پر گری جب عثمان خواجہ ٩٠ رنز بنا کر شاہین آفریدی کی گیند پر کیچ آؤٹ ہوئے جس کے بعد آسٹریلیا نے اپنی دوسری اننگ ڈیکلیئر کردی اور پاکستان کو جیت کے لیے ٤٥٠ رنز کا ہدف دیا۔ آسٹریلوی بیٹر مچل مارش دوسری اننگز میں ٦٣ رنز پر ناٹ آؤٹ رہے۔ یاد رہے کہ اس ٹیسٹ میچ کی پہلی اننگ میں آسٹریلیا نے ٤٨٧ رنز بنائے تھے جس کے بعد پاکستان ٹیم پہلی اننگ میں ٢٧١ رنز بنا کر آؤٹ ہوگئی تھی۔ پاکستان ٹیم کو آؤٹ کرنے کے بعد آسٹریلیا نے ٢١٦ رنز کی برتری کے ساتھ دوسری اننگ کا آغاز کیا تھا۔

Facebook Comments Box