9 محرم الحرام پر پاکستان کے مختلف شہروں سے جلوس نکالے جارہے ہیں۔
کراچی میں 9 محرم الحرام کا مرکزی جلوس نشترپارک سےدوپہر ایک بجے برآمد ہوگا، جلوس ایم اے جناح روڈ، صدر ایمپریس مارکیٹ، تبت سینٹر سے گزرتے ہوئے کھارادر میں حسنینہ ایرانیان امام بارگاہ پر اختتام پذیر ہو گا۔
لاہور میں مرکزی جلوس پانڈو اسٹریٹ اسلام پورہ سے برآمد ہوگا اور مقررہ راستوں سے ہوتا ہوا واپس پانڈو اسٹریٹ پہنچ کر ختم ہوگا۔
روہڑی میں نو ڈھالہ تعزیہ کا 500 سالہ تاریخی جلوس روایتی راستوں پر رواں دواں ہے۔
اسلام آباد میں 9 محرم کا مرکزی جلوس امام بارگاہ اثناء عشری سے برآمد ہوگا اور مقررہ راستوں سے ہوتا ہوا واپس امام بارگاہ اثناء عشری پر ختم ہوگا۔
پشاور کا جلوس امام بارگاہ حسینیہ ہال سے 10بجے برآمد ہوا، جبکہ کوئٹہ میں مرکزی جلوس ڈیڑھ بجے میکانگی روڈ سے برآمد ہوگا۔
اس موقع پر ملک بھر میں سکیورٹی کے سخت انتظامات کیے گئے ہیں، اس کے علاوہ مختلف شہروں میں جلوس کے اوقات میں موبائل سروس بھی بند رہے گی۔
