غیر قانونی تارکین وطن کو واپس لانے والا امریکی طیارہ بھارت پہنچ گیا
ماسکو (انٹرنیشنل ڈیسک)
امریکہ کا ایک فوجی جہاز حال ہی میں ملک سے ڈی پورٹ کیے گئے غیرقانونی تارکین کو لے کر بھارت پہنچ گیا ہے۔ روئٹرز کے مطابق ایک عینی شاہد نے بدھ کو بھارت کے شمالی شہر امرتسر کے ایئرپورٹ پر امریکی فوجی جہاز کو لینڈ کرتے ہوئے دیکھا۔ خیال رہے امریکہ کے صدر ڈونلڈ ٹرمپ کی جانب سے ملک میں غیرقانونی طور پر مقیم افراد کو بے دخل کرنے کے اعلان کے بعد ان اقدامات کافی تیزی دیکھنے میں آئی ہے۔ دوسری جانب بھارتی وزارت خارجہ نے کہا ہے کہ بھارت غیر قانونی امیگریشن کے خلاف ہے کیونکہ یہ منظم جرائم کی کئی شکلوں سے جڑی ہوئی ہے۔ بھارتی وزیر خارجہ ڈاکٹر ایس جے شنکر نے کہا تھا کہ نئی دہلی امریکہ سمیت بیرون ملک ‘غیر قانونی طور پر‘ رہنے والے بھارتی شہریوں کی ”جائز واپسی‘‘ کے لیے تیار ہے۔
مقامی میڈیا کا کہنا ہے کہ اس جہاز میں 205 افراد کو لایا گیا جب کہ کچھ میڈیا رپورٹس کے مطابق یہ تعداد 105 ہے۔ ان افراد میں سے بیش تر کا تعلق پنجاب اور گجرات سے ہے۔ صدر ڈونلڈ ٹرمپ اپنے امیگریشن سے متعلق ایجنڈے پر عمل درآمد کے لیے بڑے پیمانے پر فوجی اڈوں اور طیاروں کو بروئے کار لا رہے ہیں۔ اس سے قبل بھی امریکہ سے غیرقانونی طور پر مقیم بھارتی شہریوں کو واپس بھیجا جاتا رہا ہے تاہم اس مقصد کے لیے فوجی جہاز کا استعمال پہلی مرتبہ ہو رہا ہے۔ روئٹرز نے منگل کو رپورٹ کیا تھا کہ ایک سی۔17 طیارہ انڈین تارکین کو لے کر روانہ ہوا ہے لیکن وہ 24 گھنٹے تک انڈیا نہیں پہنچ سکا تھا۔ اس دوران اسے پبلک فلائٹ ٹریکرر کی مدد سے دیکھا بھی نہیں جا سکتا تھا۔