اردن کے شاہ عبداللّٰہ دوم دو روزہ دورے پر پاکستان پہنچ گئے
اسلام آباد (صداۓ روس)
اردن کے شاہ عبداللّٰہ دوم دو روزہ سرکاری دورے پر اسلام آباد پہنچ گئے جہاں صدرِ پاکستان آصف علی زرداری اور وزیراعظم شہباز شریف نے نور خان ایئر بیس پر ان کا پرتپاک استقبال کیا۔ اس موقع پر وفاقی وزراء، خاتونِ اوّل بی بی آصفہ بھٹو زرداری اور چیئرمین پیپلز پارٹی بلاول بھٹو زرداری بھی موجود تھے۔ پاکستانی فضائی حدود میں داخل ہوتے ہی پاک فضائیہ کے جنگی طیاروں نے شاہی طیارے کو خصوصی حفاظتی حصار فراہم کیا جبکہ وزیرِ اعظم ہاؤس پہنچنے پر شاہ عبداللّٰہ دوم کو گارڈ آف آنر بھی پیش کیا گیا۔
صدر آصف زرداری نے کہا کہ شاہ عبداللّٰہ دوم کا دورہ پاکستان اور اردن کے تعلقات کو نئی اسٹریٹجک جہت فراہم کرے گا۔ ان کا کہنا تھا کہ دونوں ممالک کے تعلقات تاریخی برادری، باہمی اعتماد اور مشترکہ اقدار پر قائم ہیں۔ دفترِ خارجہ کے مطابق، اس دورے سے دونوں ممالک کے درمیان اسٹریٹجک تعاون مزید گہرا ہوگا۔ شاہ عبداللّٰہ دوم صدر اور وزیراعظم سے علیحدہ علیحدہ ملاقاتیں کریں گے جبکہ وفود کی سطح پر بھی مذاکرات ہوں گے۔
ترجمان دفتر خارجہ نے بتایا کہ ایوانِ صدر میں شاہ عبداللّٰہ دوم کو پاکستان کا اعلیٰ ترین سول ایوارڈ بھی دیا جائے گا۔ اعلامیے کے مطابق، وزیراعظم شہباز شریف کے ساتھ وزیرِ اعظم ہاؤس میں ہونے والی ملاقات میں دو طرفہ تعلقات، دفاعی تعاون، تجارت اور خطے کی صورتحال پر اہم گفتگو ہوگی۔ شاہ عبداللّٰہ کا یہ دورہ پاکستان اور اردن کے دیرینہ اور برادرانہ تعلقات کو مزید مضبوط کرے گا اور دونوں ممالک کے درمیان دوطرفہ تعاون کے نئے در وا کرے گا۔ 
