کریسنئی لیمان جلد آزاد ہو جائے گا، یوکرینی افواج ناکام ہو چکی ہیں، صدر پوتن
ماسکو (اشتیاق ہمدانی)
صدر پوتن نے سالانہ “سال کے نتائج” پروگرام کے دوران کہا کہ روسی افواج جلد ہی کریسنئی لیمان کا کنٹرول حاصل کر لیں گی اور اس کے بعد سلویانسک کی طرف پیش قدمی جاری رکھیں گی۔ انھوں نے کہا کہ ”آزاد شدہ شہر سیویرسک کے جنوب میں لیمان کی جنوبی سمت میں ہماری افواج فعال اور موثر انداز میں کارروائی کر رہی ہیں۔ ہماری فوجیں پہلے ہی شہر میں داخل ہو چکی ہیں اور وہاں جھڑپیں جاری ہیں۔ مجھے یقین ہے کہ کریسنئی لیمان بہت جلد آزاد ہو جائے گا۔“ صدر پوتن نے مزید بتایا کہ فی الحال روسی افواج شہر کے تقریباً نصف حصے پر قابض ہیں اور پیش قدمی سلویانسک کی طرف جاری رہے گی۔ صدر پوتن نے اپنے سالانہ ٹیلیویژن “ڈائریکٹ لائن” سیشن میں یہ بھی کہا کہ یوکرینی افواج ڈونیٹسک پیپلز ریپبلک میں کراسنوآرمیسک کے کچھ حصوں کو دوبارہ حاصل کرنے کی ناکام کوششیں کر رہی ہیں اور شدید نقصانات اٹھا رہی ہیں۔ ان کا کہنا تھا کہ ”دشمن شہر کے کم از کم کچھ حصوں کو واپس لینے کی کوشش کر رہا ہے، لیکن یہ کوششیں ناکام ہیں۔ دشمن کو بھاری نقصانات ہو رہے ہیں اور کوئی کامیابی نہیں مل رہی۔“
یہ بیانات خصوصی فوجی آپریشن کے محاذ پر روسی افواج کی مسلسل پیش قدمی کی عکاسی کرتے ہیں، جہاں ڈونباس کے کلیدی علاقوں میں اسٹریٹیجک برتری حاصل کی جا رہی ہے۔ صدر پوتن کے مطابق روسی فورسز کی موثر کارروائیاں دشمن کی مزاحمت کو توڑ رہی ہیں، جبکہ یوکرینی کوششیں بے نتیجہ ثابت ہو رہی ہیں۔ یہ پیشرفت علاقائی توازن کو مزید روسی حق میں تبدیل کرنے کا اشارہ ہے۔
