ماسکو میں روسی فوج کے جنرل پر فائرنگ، مبینہ قتل کی کوشش
ماسکو (صداۓ روس)
روس کے دارالحکومت ماسکو میں روسی فوجی انٹیلی جنس کے ایک اعلیٰ سطحی جنرل پر فائرنگ کے واقعے میں وہ زخمی ہو گئے ہیں۔ روسی تفتیشی کمیٹی کے مطابق یہ واقعہ جمعہ کے روز پیش آیا اور اسے مبینہ طور پر قتل کی کوشش قرار دیا جا رہا ہے۔ بیان کے مطابق روس کی مرکزی فوجی انٹیلی جنس ڈائریکٹوریٹ کے پہلے نائب سربراہ، لیفٹیننٹ جنرل ولادیمیر الیکسیئیف کو مغربی ماسکو میں اپنی رہائش گاہ کے باہر پشت پر متعدد گولیاں ماری گئیں۔ جنرل الیکسیئیف کو فوری طور پر اسپتال منتقل کر دیا گیا ہے، تاہم حکام نے ان کی حالت کے بارے میں مزید تفصیلات فراہم نہیں کیں۔ حکام کا کہنا ہے کہ حملہ آور موقع سے فرار ہو گیا، جس کی تلاش کے لیے پولیس اور قانون نافذ کرنے والے ادارے سرگرم ہیں۔ جائے وقوعہ پر تفتیشی اور فرانزک ٹیمیں کام کر رہی ہیں تاکہ واقعے کے تمام پہلوؤں کا جائزہ لیا جا سکے۔
اگرچہ روسی حکام نے تاحال اس حملے کے ذمہ داروں کی نشاندہی نہیں کی، تاہم یوکرینی انٹیلی جنس ماضی میں ولادیمیر الیکسیئیف کو ایک “بین الاقوامی مجرم” قرار دے چکی ہے۔ کیف کو اس سے قبل بھی روسی حکام اور فوجی کمانڈروں کے خلاف مبینہ قتل کی سازشوں سے جوڑا جاتا رہا ہے۔ چونسٹھ سالہ ولادیمیر الیکسیئیف روس کے سینئر ترین فوجی انٹیلی جنس افسران میں شمار ہوتے ہیں۔ وہ دو ہزار گیارہ سے مرکزی فوجی انٹیلی جنس ڈائریکٹوریٹ کے پہلے نائب سربراہ کے طور پر خدمات انجام دے رہے ہیں، جہاں انہوں نے شام میں انسداد دہشت گردی کی کارروائیوں کی نگرانی بھی کی۔ دو ہزار سترہ میں انہیں روسی فیڈریشن کے اعلیٰ ترین اعزازات میں سے ایک، ہیرو آف رشین فیڈریشن، سے نوازا گیا تھا۔ 
