چین میں غیر روایتی اسٹیئرنگ وہیلز پر پابندی کا امکان
ماسکو (انٹرنیشنل ڈیسک)
چین کی وزارتِ صنعت و تجارت نے گاڑیوں کے لیے قومی سیفٹی اسٹینڈرڈ کا مسودہ جاری کر دیا ہے، جس کے تحت غیر معیاری ڈیزائن والے اسٹیئرنگ وہیلز پر پابندی عائد کی جا سکتی ہے۔ چینی آٹو ویب سائٹ CarNewsChina کے مطابق اگر یہ مسودہ منظور ہو گیا تو فارمولا ون طرز کے کٹے ہوئے یا اوپر سے کھلے اسٹیئرنگ وہیلز کی تنصیب ممنوع قرار دی جا سکتی ہے۔
مجوزہ ضوابط کے مطابق حادثے کی صورت میں اسٹیئرنگ وہیل کے کنارے پر دس مخصوص مقامات پر امپیکٹ لوڈ ٹیسٹ لازمی ہوں گے۔ ایسے وہیلز جن میں اوپری حصہ موجود نہیں ہوتا، ان ٹیسٹ پوائنٹس پر پورا نہیں اترتے، جس سے نئے معیار کی تعمیل مشکل ہو جاتی ہے۔ 
نئے معیار میں اسٹیئرنگ کالم کی تصادم کے دوران حرکت اور ایئر بیگز کے کھلنے کے طریقۂ کار کے لیے بھی سخت تقاضے شامل کیے گئے ہیں۔ یہ قوانین یکم جنوری 2027 سے نافذ ہونے کی توقع ہے۔
رپورٹ کے مطابق موجودہ سیفٹی اسٹینڈرڈ ایک دہائی سے زائد عرصے سے رائج ہیں اور چینی آٹو انڈسٹری کی تیز رفتار ترقی کے تناظر میں انہیں فرسودہ سمجھا جا رہا ہے۔ حادثاتی اعداد و شمار ظاہر کرتے ہیں کہ ڈرائیور کی 46 فیصد چوٹیں اسٹیئرنگ وہیل سے ٹکراؤ کے باعث ہوتی ہیں، جبکہ روایتی گول وہیل نسبتاً بہتر جھٹکا جذب کرنے والی سطح فراہم کرتے ہیں۔
اسی مسودے میں اہم گاڑی کنٹرولز کو ٹچ اسکرینز پر منتقل کرنے کی حوصلہ شکنی بھی کی گئی ہے۔ اس سے قبل چین نے چھپے ہوئے دروازہ ہینڈلز والی گاڑیوں کی تیاری پر پابندی کا اعلان کیا تھا، جو مہلک واقعات کے بعد کیا گیا قدم تھا۔ یہ پابندی بھی 2027 سے نافذ العمل ہوگی۔
