رمضان سے قبل لاہور میں پھلوں اور سبزیوں کی قیمتیں بڑھ گئیں
لاہور (صداۓ روس)
ماہِ صیام کی آمد سے پہلے ہی صوبائی دارالحکومت لاہور میں پھلوں اور سبزیوں کی قیمتوں میں نمایاں اضافہ دیکھنے میں آیا ہے۔ شہریوں کے مطابق روزمرہ استعمال کی متعدد اشیا سرکاری نرخ نامے کے برعکس مہنگے داموں فروخت کی جا رہی ہیں۔ مارکیٹ میں درجۂ اوّل کی کھجور کی قیمت 495 روپے سے بڑھ کر 1000 روپے فی کلو تک پہنچ گئی ہے، جبکہ انگور 600 روپے کے بجائے 1000 روپے فی کلو فروخت ہو رہے ہیں۔ سیب اور انار کی قیمتوں میں بھی فی کلو 100 روپے اضافہ ریکارڈ کیا گیا ہے، جس کے بعد سیب 500 روپے اور انار 800 روپے فی کلو میں دستیاب ہیں۔ سبزیوں کی قیمتوں میں بھی اضافہ ہوا ہے۔ بھنڈی 230 روپے سے بڑھ کر 300 روپے فی کلو، لیموں 60 کے بجائے 100 روپے فی کلو، آلو 20 روپے کے بجائے 30 روپے فی کلو تک جا پہنچے ہیں، جبکہ ٹماٹر 80 سے بڑھ کر 100 روپے فی کلو فروخت ہو رہے ہیں۔ شہری حلقوں نے مطالبہ کیا ہے کہ متعلقہ ادارے سرکاری نرخ نامے پر عملدرآمد یقینی بنائیں تاکہ رمضان المبارک سے قبل مہنگائی کے دباؤ میں کمی لائی جا سکے۔
