روس ایران جنگ میں غیر جانبدار نہیں، برطانیہ میں روسی سفیر کا بڑا بیان
ماسکو (صداۓ روس)
برطانیہ میں روس کے سفیر آندرے کیلین نے کہا ہے کہ امریکہ اور اسرائیل کی ایران کے خلاف جاری جنگ میں روس غیر جانبدار نہیں ہے اور ماسکو تہران کی حمایت کرتا ہے۔ انہوں نے ایک انٹرویو میں کہا کہ روس اور ایران کے درمیان قریبی تعلقات ہیں، تاہم ایران نے اب تک فضائی حملوں کے معاملے میں روس سے کسی براہ راست فوجی مدد کی درخواست نہیں کی۔ آندرے کیلین نے اسکائی نیوز کے پروگرام “سنڈے مارننگ ود ٹریور فلپس” میں گفتگو کرتے ہوئے کہا کہ روس اس تنازع میں غیر جانبدار نہیں رہ سکتا اور وہ ایران کے ساتھ ہمدردی رکھتا ہے۔ ان کا کہنا تھا کہ روس اس صورتحال میں ہونے والے اقدامات کو منفی نظر سے دیکھتا ہے۔ انہوں نے مزید کہا کہ ایران روس کا ہمسایہ ملک ہے اور دونوں ممالک کے درمیان ہمیشہ سے اچھے تعلقات رہے ہیں۔ دوسری جانب یہ رپورٹس بھی سامنے آئی ہیں کہ قبرص میں واقع برطانوی فضائی اڈے آر اے ایف اکروتیری کو اتوار کے روز لبنان سے داغے گئے ایک ایرانی ڈرون نے نشانہ بنایا۔ اطلاعات کے مطابق اس ڈرون میں روسی ساختہ کومیٹا-بی نیویگیشن سسٹم نصب تھا۔ یہ ٹیکنالوجی اس سے قبل دسمبر میں یوکرینی فضائی دفاع کے ہاتھوں تباہ کیے گئے ڈرونز میں بھی دیکھی گئی تھی۔
رپورٹس کے مطابق یہ بھی دعویٰ کیا جا رہا ہے کہ روس مشرق وسطیٰ میں امریکی فوجی اثاثوں، بشمول جنگی بحری جہازوں اور طیاروں کے مقامات سے متعلق ایران کو انٹیلی جنس معلومات فراہم کر رہا ہے، تاہم اس حوالے سے باضابطہ تصدیق سامنے نہیں آئی۔
