ماسکو(انٹرنیشنل ڈیسک)
یوکرین کے صدر وولودیمیر زیلنسکی نے کہا ہے کہ ان کا ملک آبنائے ہرمز کو دوبارہ کھولنے میں مدد فراہم کر سکتا ہے، جس کی بندش سے عالمی معیشت کو شدید دھچکا لگا ہے۔ جمعرات کو صحافیوں سے گفتگو کرتے ہوئے زیلنسکی نے کہا، “اس معاملے میں کسی نے خاص طور پر ہمیں شامل نہیں کیا، لیکن اپنے دوروں کے دوران میں نے مشرق وسطیٰ اور خلیجی ممالک کے نمائندوں سے کہا کہ یوکرین دفاع سے متعلق ہر معاملے میں مدد کے لیے تیار ہے۔” انہوں نے بتایا کہ یوکرین کو بحیرہ اسود میں بحری راستوں کو بحال کرنے کا تجربہ ہے، جہاں روس نے جنگ کے آغاز میں راستہ بند کر دیا تھا۔ ایک الگ انٹرویو میں زیلنسکی نے کہا کہ آبنائے ہرمز کو دوبارہ کھولنے کے لیے ڈرون روکنے والے نظام، فوجی قافلے اور الیکٹرانک وارفیئر جیسے اقدامات کی ضرورت پڑ سکتی ہے۔ انہوں نے واضح کیا، “ہم اس سلسلے میں مدد کرنے کے لیے تیار ہیں۔”
دریں اثنا اقوام متحدہ کی سلامتی کونسل نے آج اس قرارداد پر ووٹنگ مؤخر کر دی ہے جس میں بحری راستے میں جہازوں کی حفاظت کے لیے “دفاعی” طاقت کے استعمال کی اجازت دینے کی بات کی گئی تھی۔
