ٹرمپ امریکی عوام کیلئے مشکلات پیدا کر رہے ہیں، برازیلی صدر

ماسکو(انٹرنیشنل ڈیسک)

برازیلی صدر لویز اناسیو لولا ڈا سلوا نے کہا ہے کہ امریکی صدر ڈونلڈ ٹرمپ کی پالیسیاں بالآخر امریکی عوام کے لیے مشکلات پیدا کر رہی ہیں۔ لولا نے جمعرات کو شائع ہونے والے انٹرویو میں کہا کہ “ٹرمپ ایک بہت خطرناک کھیل کھیل رہے ہیں۔ وہ سمجھتے ہیں کہ امریکہ کی معاشی، فوجی اور تکنیکی طاقت کھیل کے اصول طے کرتی ہے، لیکن نتیجہ یہ نکل رہا ہے کہ امریکہ خود مشکلات میں پھنس رہا ہے۔” انہوں نے ایران پر حملے کا حوالہ دیتے ہوئے کہا کہ “جب ٹرمپ نے ایران پر حملہ کرنے کا فیصلہ کیا تو شاید انہیں اندازہ نہیں تھا کہ ایندھن کی قیمتیں بڑھ جائیں گی اور اس کا خمیازہ عوام کو بھگتنا پڑے گا۔” امریکہ میں ایران جنگ کے بعد ایندھن کی قیمتیں آسمان چھو رہی ہیں۔ آبنائے ہرمز کی بندش اور علاقائی پٹرو کیمیکل سہولیات کو نقصان پہنچنے کی وجہ سے امریکہ میں پٹرول کی اوسط قیمت $4.09 فی گیلن ہو گئی ہے، جو فروری کے آخر میں $2.94 تھی۔

ایران اور امریکہ کے درمیان حالیہ سیز فائر کے باوجود مذاکرات ناکام رہے ہیں۔ ایران نے امریکہ پر غیر حقیقت پسندانہ مطالبات کا الزام لگایا ہے جبکہ واشنگٹن نے تہران سے منسلک جہازوں پر آبنائے ہرمز میں پابندی لگا دی ہے۔ وائٹ ہاؤس کی ترجمان کارولائن لیوٹ نے بدھ کو کہا کہ نئے مذاکرات کی امکان پر بات چیت جاری ہے۔ روسی سلامتی کونسل نے الزام لگایا ہے کہ امریکہ اور اسرائیل مذاکرات کو ایران پر زمینی حملے کی تیاری کے لیے استعمال کر رہے ہیں۔