ماسکو (صداۓ روس)
روسی صدر ولادیمیر پوتن 18ویں بریکس سربراہی اجلاس میں شرکت کے لیے نئی دہلی پہنچ گئے ہیں، جو جمعہ سے شروع ہو رہا ہے۔ صدر پوتن نے بھارت منڈپم کنونشن سینٹر میں بھارتی وزیراعظم نریندر مودی اور جنوبی افریقی صدر سیرل رامافوسا کے ساتھ دو طرفہ مذاکرات کیے۔ وہ توسیع شدہ برکس گروپ کے دیگر رہنماؤں سے بھی بات چیت کریں گے۔ روسی صدر نے مودی کو روس میں 24ویں بھارت روس سالانہ سربراہی اجلاس کے لیے مدعو کیا، جسے بھارتی وزیراعظم نے قبول کر لیا۔ رامافوسا نے گزشتہ نومبر میں جنوبی افریقہ کی میزبانی میں ہونے والے جی 20 سربراہی اجلاس میں روس کی حمایت پر پوتن کا شکریہ ادا کیا۔ پوتن نے رامافوسا کے ساتھ مذاکرات کا آغاز کرتے ہوئے کہا کہ روس افریقی ممالک کے ساتھ تعلقات کو فروغ دینے کو خاص اہمیت دیتا ہے۔
صدر پوتن نے کہا کہ ماسکو 28-29 اکتوبر کو تیسرے روس افریقہ سربراہی اجلاس کی میزبانی کی تیاری کر رہا ہے، جس کی ترجیحات میں ڈیجیٹل ٹیکنالوجی، پرامن جوہری توانائی، خودمختار ادائیگی کے نظام اور غذائی تحفظ شامل ہیں۔ کریملن کے معاون یوری یوشاکوف کے مطابق پوتن نے مودی کو 5 ستمبر کو ماسکو میں امریکی مذاکرات کاروں اسٹیو وٹکوف اور جیرڈ کشنر کے ساتھ تقریباً تین گھنٹے تک جاری رہنے والی ملاقات اور صدر ٹرمپ کے ساتھ ٹیلیفونک گفتگو سے آگاہ کیا۔ صدر پوتن اور مودی نے یوکرین تنازع پر بھی تبادلہ خیال کیا۔ بھارتی وزیراعظم نریندر مودی نے سربراہی اجلاس کے موقع پر ایران کے صدر مسعود پزشکیان سے بھی دو طرفہ مذاکرات کیے، جن میں مودی نے کہا کہ سمندری مسافروں کی حفاظت بھارت کی اولین ترجیح رہے گی۔
