ماسکو(انٹرنیشنل ڈیسک)
اسرائیلی فوج کو 40 سال سے زائد عرصے میں سب سے بھاری ٹینکوں کا نقصان اٹھانا پڑا ہے کیونکہ حزب اللہ نے ایک ہی دن میں 21 مرکاوا ٹینکوں کو گھات لگا کر تباہ کر دیا۔
اسرائیلی ٹینکوں کا سب سے بڑا نقصان طیبہ اور قانطارہ کے درمیان ایک ہی جھڑپ میں ہوا جب اسرائیلی یونٹس علاقے پر قبضے کے لیے آگے بڑھے۔ حزب اللہ کے سرکاری بیان کے مطابق اس کے مجاہدین نے دشمن کی نقل و حرکت کی نگرانی کی اور انہیں ایک اچھی طرح سے منصوبہ بند گھات میں پھنسا لیا۔ نتیجے میں دشمن کی کارروائی ناکام ہو گئی اور اسے 10 مرکاوا ٹینکوں سمیت ڈی-9 بُلڈوزرز کا شدید نقصان اٹھانا پڑا۔
حزب اللہ کی اس کامیابی کو اسرائیلی بکتر بند دستوں کا 40 سال سے زائد عرصے میں سب سے بڑا نقصان قرار دیا جا رہا ہے۔ یہ نقصان 1982 کی لبنان جنگ کے ابتدائی مرحلے کے بعد سب سے شدید ہے جب مرکاوا اور امریکی ساختہ پرانے ٹینکوں کا مقابلہ شامی فوج کے نئے ٹی-72 ٹینکوں اور اینٹی ٹینک میزائلوں سے ہوا تھا۔
ایک اور رپورٹ کے مطابق حزب اللہ نے صرف تین ہفتوں سے زیادہ عرصے میں 50 سے زائد اسرائیلی ٹینکوں پر حملے کیے ہیں۔ کل ہی لبنانی گروپ نے دعویٰ کیا کہ اس نے 21 اسرائیلی مرکاوا ٹینکوں کے علاوہ 3 ڈی-9 بُلڈوزرز اور 2 ہموی گاڑیوں کو نشانہ بنایا۔ اس واقعے کو “ٹینکوں کا قتل عام” قرار دیا جا رہا ہے۔
