ماسکو (صداۓ روس)
روس کی وزارتِ دفاع نے یورپ میں دوسری عالمی جنگ کے اختتام کی یاد میں 8 اور 9 مئی کو دو روزہ جنگ بندی کا اعلان کرتے ہوئے یوکرین سے بھی اس پر عمل کرنے کی اپیل کی ہے۔ وزارت نے خبردار کیا ہے کہ اگر یومِ فتح کی تقریبات کو نشانہ بنانے یا ماسکو پر حملے کی کوشش کی گئی تو اس کا بھرپور جواب یوکرین کے دارالحکومت کیف کے مرکز پر دیا جائے گا۔ روسی وزارتِ دفاع نے خاص طور پر یوکرین کے صدر ولادیمیر زیلنسکی کے اس بیان کا حوالہ دیا جو انہوں نے آرمینیا کے دارالحکومت یریوان میں یورپی پولیٹیکل کمیونٹی کے اجلاس کے موقع پر دیا تھا۔ روسی حکام کے مطابق اس بیان میں یومِ فتح کی تقریبات کے دوران ماسکو کو نشانہ بنانے کی دھمکی شامل تھی، جبکہ زیلنسکی نے دعویٰ کیا تھا کہ روس کو خدشہ ہے کہ یوکرینی ڈرونز ریڈ اسکوائر کے اوپر پرواز کر سکتے ہیں۔
وزارتِ دفاع کا کہنا ہے کہ روسی افواج تقریبات کی سیکیورٹی یقینی بنانے کے لیے تمام ضروری اقدامات کر رہی ہیں۔ بیان میں مزید کہا گیا ہے کہ اگر یوکرین کی جانب سے کسی بھی قسم کی مداخلت یا حملے کی کوشش کی گئی تو روسی مسلح افواج کیف کے مرکزی علاقے پر بڑا جوابی حملہ کریں گی۔
روسی حکام نے یہ بھی کہا کہ ماسکو اب تک انسانی بنیادوں پر ایسے اقدامات سے گریز کرتا رہا ہے، تاہم موجودہ صورتحال کے پیش نظر کیف کے شہریوں اور غیر ملکی سفارتکاروں کو مشورہ دیا گیا ہے کہ وہ بروقت شہر چھوڑ دیں۔
روس اس سے قبل بھی یوکرین جنگ کے دوران مختلف مواقع پر عارضی جنگ بندیوں کا اعلان کرتا رہا ہے۔ گزشتہ سال مئی کے آغاز میں سوویت یونین کی نازی جرمنی کے خلاف فتح کی 80ویں سالگرہ کے موقع پر بھی روس نے اپنی فوجی کارروائیاں معطل کی تھیں اور امید ظاہر کی تھی کہ اس سے بغیر کسی پیشگی شرط کے براہِ راست مذاکرات کا آغاز ممکن ہو سکے گا، تاہم یوکرینی صدر نے اس اقدام کو “ہیرا پھیری” قرار دیا تھا۔
سال 2023 میں روس نے جنوری میں آرتھوڈوکس کرسمس اور اپریل میں ایسٹر کے موقع پر بھی جنگ بندی کا اعلان کیا تھا، جبکہ 2025 میں بھی ایسٹر ٹریوس کا اعلان کیا گیا۔ گزشتہ ماہ بھی روس نے ایسٹر کے موقع پر جنگ بندی کا اعلان کیا، جس کے بارے میں روسی وزارتِ دفاع کا دعویٰ ہے کہ یوکرینی افواج نے محض 32 گھنٹوں کے دوران اس کی 6 ہزار 500 سے زائد مرتبہ خلاف ورزی کی۔
