ماسکو (صداۓ روس)
روسی صدر ولادیمیر پوتن کے سرمایہ کاری اور معاشی تعاون کے خصوصی ایلچی کرل دمترییف نے کہا ہے کہ امریکہ کی کم لاگت والی ایئر لائن “اسپریٹ ایئر لائنز” تاریخی توانائی بحران کی پہلی قربانی بن گئی ہے۔ اسپریٹ ایئر لائنز نے ہفتے کے روز اعلان کیا کہ وہ فوری طور پر اپنے آپریشن معطل کر رہی ہے۔ کمپنی نے حالیہ ہفتوں میں ایندھن کی قیمتوں میں بے تحاشہ اضافے اور دیگر مالی دباؤ کو وجہ قرار دیا۔ کرل دمترییف نے X پر لکھا اسپریٹ ایئر لائنز دیوالیہ ہو گئی — تاریخی توانائی بحران کی پہلی ایئر لائن قربانی۔ جیٹ فیول کی قیمت $2.5 سے بڑھ کر $4 فی گیلن ہو گئی۔ 17,000 لوگ بے روزگار۔” رپورٹس کے مطابق کمپنی کے بانڈ ہولڈرز نے ٹرمپ انتظامیہ کی جانب سے پیش کیے گئے آخری لمحات کے ریسکیو پیکج کو مسترد کر دیا تھا، جس میں $500 ملین کی امداد اور حکومت کو 90 فیصد تک حصص دینے کی تجویز شامل تھی۔
اس بندش سے تقریباً 17,000 افراد بے روزگار ہو جائیں گے جن میں 14,000 اسپریٹ کے ملازمین اور ہزاروں کنٹریکٹرز شامل ہیں۔ اس کے علاوہ صنعت بھر میں کرایوں میں اضافے کا خدشہ ہے۔ اسپریٹ کے صدر اور سی ای او ڈیو ڈیوس نے بیان میں کہا کہ ایندھن کی قیمتوں میں مسلسل اضافے کے باعث کمپنی کے پاس آپریشن معطل کرنے کے سوا کوئی راستہ نہیں بچا تھا۔ بین الاقوامی توانائی ایجنسی نے خبردار کیا ہے کہ امریکہ اور اسرائیل کی ایران کے خلاف جنگ کے باعث ہرمز آبنائے میں ٹینکر ٹریفک شدید متاثر ہوا ہے، جو عالمی تیل کی تقریباً ایک پنجم سپلائی کا اہم راستہ ہے۔ اس سے دنیا بھر میں جیٹ فیول کا بحران پیدا ہو گیا ہے۔
