ماسکو (صداۓ روس)
روس کے صدر ولادیمیر پوتن نے کہا ہے کہ عالمی کھیلوں کے میدان میں روس کا مضبوط مؤقف برقرار ہے اور حالیہ بین الاقوامی مقابلوں میں روسی کھلاڑیوں کی کارکردگی اس کا واضح ثبوت ہے۔ انہوں نے یہ بات کریملن میں باکسنگ ورلڈ چیمپئن شپ کے تمغہ جیتنے والے کھلاڑیوں کو سرکاری اعزازات دینے کی تقریب سے خطاب کرتے ہوئے کہی۔ صدر پوتن نے کہا کہ روسی کھلاڑیوں کی کامیابیاں عالمی سطح پر ملک کی مضبوط پوزیشن کی عکاسی کرتی ہیں، جو ان کے بقول “غیر منصفانہ کوششوں” کے باوجود برقرار ہے۔ انہوں نے اس عزم کا اظہار کیا کہ روسی کھلاڑی مستقبل میں بھی قومی پرچم تلے اور قومی ترانے کی دھن کے ساتھ عالمی مقابلوں میں مزید کامیابیاں حاصل کریں گے۔ انہوں نے International Olympic Committee کی نئی قیادت پر زور دیا کہ وہ اپنے پیشروؤں کی “شرمناک اور پیچیدہ میراث” سے جلد نجات حاصل کرے اور عالمی کھیلوں کے نظام کو بہتر بنائے۔ صدر پوتن کے مطابق بین الاقوامی کھیلوں کی تنظیموں کو موجودہ مسائل پر قابو پانا ہوگا۔
واضح رہے کہ 28 فروری 2022 کو آئی او سی نے یوکرین میں روسی فوجی کارروائی کے بعد عالمی اسپورٹس فیڈریشنز کو سفارش کی تھی کہ روس اور بیلاروس کے کھلاڑیوں کو بین الاقوامی مقابلوں سے خارج کر دیا جائے۔ اس کے بعد بیشتر عالمی فیڈریشنز نے دونوں ممالک کے کھلاڑیوں کی شرکت پر پابندی عائد کر دی تھی۔ بعد ازاں مارچ 2023 میں آئی او سی نے محدود شرائط کے ساتھ روس اور بیلاروس کے انفرادی کھلاڑیوں کو غیر جانبدار حیثیت میں مقابلوں میں شرکت کی اجازت دینے کی سفارش کی، تاہم انہیں ٹیم ایونٹس سے باہر رکھا گیا۔ مزید برآں 12 اکتوبر 2023 کو آئی او سی نے Russian Olympic Committee کو معطل کر دیا تھا، جب اس نے ڈونیتسک، لوگانسک، زاپوروزیے اور خیرسون کے اولمپک کونسلز کو اپنی رکنیت میں شامل کیا۔
