اسلام آباد (صداۓ روس)
روسی کمپنی Zavod Medsintez اور اس کی پاکستانی شراکت دار کمپنی Genetics Pharmaceuticals Private Limited نے پاکستان میں انسولین کی مقامی پیداوار شروع کرنے کے لیے تقریباً 8 کروڑ ڈالر سرمایہ کاری کا منصوبہ تیار کر لیا ہے۔ ذرائع کے مطابق منصوبے کے تحت پاکستان میں دو مراحل میں انسولین مینوفیکچرنگ اور ایسپٹک فلنگ پلانٹس قائم کیے جائیں گے۔ پہلے مرحلے میں تقریباً 2 کروڑ ڈالر کی لاگت سے ایسپٹک فلنگ پلانٹ تعمیر کیا جائے گا، جہاں انسولین اور متعلقہ مصنوعات کی بلک درآمد اور فلنگ کا عمل انجام دیا جائے گا۔ یہ مرحلہ دسمبر 2028 تک مکمل ہونے کی توقع ہے۔ دوسرے مرحلے میں تقریباً 6 کروڑ ڈالر کی سرمایہ کاری سے API پروڈکشن پلانٹ قائم کیا جائے گا، جہاں بائیوٹیکنالوجی کی مدد سے انسولین کی تیاری، API پیوریفکیشن سے لے کر پیکجنگ تک مکمل عمل مقامی سطح پر کیا جائے گا۔ اس مرحلے کی تکمیل دسمبر 2031 تک متوقع ہے۔ Drug Regulatory Authority of Pakistan نے روسی کمپنی اور اس کے مقامی پارٹنر کو Rosinsulin R، Rosinsulin C اور Rosinsulin M 30/70 مصنوعات پاکستان میں متعارف کرانے کی اجازت بھی دے دی ہے۔
حکام کے مطابق منصوبے میں ٹیکنالوجی ٹرانسفر اور بائیوٹیکنالوجی مصنوعات کی مقامی تیاری بھی شامل ہوگی، جبکہ DRAP اس منصوبے کی پیش رفت کی مسلسل نگرانی کرے گا۔ دوسری جانب وفاقی وزیر برائے بحری امور Muhammad Junaid Anwar Chaudhry نے حالیہ دنوں میں بتایا تھا کہ روس نے پاکستانی مچھلی اور سمندری خوراک کی درآمد کی بھی منظوری دے دی ہے، جس سے دونوں ممالک کے اقتصادی تعلقات مزید مضبوط ہونے کی توقع ہے۔
