بھارتی عزائم, چین کا شدید ردعمل

شاہ نواز سیال

شمالی ہنداور جنوبی ہند کے لوگ کسی بھی طرح سے ایک نہیں تھے۔ ان کے رنگ و روپ الگ تھے۔ ان کی ثقافت الگ تھی۔ ان کی زبانیں الگ تھیں۔ یہاں تک کہ ان کے دیوی دیوتا بھی الگ تھے۔ ان کی بات چیت الگ تھی۔ ان کا کھانا پینا الگ تھا۔ شمالی ہند کا کوئی آدمی جنوبی ہند کے کسی آدمی سے بات تک نہیں کرسکتا تھا کیوں کہ دونوں کی زبانیں جداگانہ تھیں۔ مہاراجہ اشوک کے مختصر دورِ حکومت میں یقیناً سارا ہندوستان ایک انتظامی اکائی تھا تاہم ان کے بعد سب ٹوٹ کر ایک مالا کے موتیوں کی طرح بکھر گیا۔ مختلف علاقوں میں مختلف راجاؤں کی حکومتیں تھیں جو آپس میں لڑتے رہتے تھے۔ لیکن١١٩٢ کے بعد سارا ہندوستان ایک انتظامی اکائی کے تحت آگیا۔ کچھ ہی عرصہ بعد علاء الدین خلجی نے منگولوں کو ماربھگانے کے بعد تمام جنوبی ہندوستان کو فتح کرکے ایک انتظامی اکائی بنادیا اور تاریخی پس منظر میں علاء الدین خلجی کو ہی اکھنڈ بھارت کا بانی قراردیاجاسکتا ہے۔ اس کے بعد سارے ہندوستان پر کسی نہ کسی طرح مسلم راج ہی رہا۔ مغلوں کے بعد انگریزوں نے٧٥ فیصد علاقے پر راج کیا۔ مہاراجے اور مسلم نوابوں اور سلطانوں کے ذریعہ حکومت کی۔
تاریخ شاہد ہے کہ مسلمانوں نے اپنے طویل دورِ حکمرانی میں کبھی بھی ہندوؤں کے مذہبی معاملات میں مداخلت نہیں کی اور نہ ہی زبردستی ہندوؤں کو اپنا مذہب تبدیل کرنے پر مجبور کیا۔ یہاں تک کہ ستی جیسی انسانیت سوز رسم کے خلاف زبردستی نہیں کی۔ صرف اورنگ زیب عالمگیرؒ نے ستی پر پابندی عائد کی تھی جس کی وجہ معاشرتی مسائل تھے۔
انگریزوں کے دورِ حکومت کے اختتام کے بعد ہندوستان ایک سیکولر ریاست کے طورپر ابھرا جہاں ہر کسی کو مذہبی آزادی حاصل تھی اور سیکولرازم دستورِ ہند کا سب سے مضبوط ستون ہے۔ دستورِ ہند نے ہر ہندوستانی کو آزادی عطا کی ہے کہ وہ اپنے مذہب‘ دین و مذہب کے مطابق اپنے خاندانی مسائل حل کرے اور اس میں حکومت کی جانب سے کوئی مخالفت نہیں ہوگی۔ خصوصاً آرٹیکل٢٥ دستورِ ہند اس ضمن میں بہت ہی واضح ہے۔ جو مذہبی آزادی کی اجازت دیتا ہے اور مسلمانوں کے خاندانی مسائل بھی مذہبی حیثیت رکھتے ہیں جن کا سرچشمہ قرآن مجید ہے۔
مسلم دورِ حکومت میں کبھی بھی غیرمسلموں پر ظلم وستم نہیں کیا گیا۔ جنگیں ہوتی رہیں لیکن ان کی نوعیت سیاسی تھی نہ کہ مذہبی ۔ مسلم حکمرانوں کی فوج اور انتظامیہ میں دونوں ہی مذاہب کے لوگ تھے ۔ مغلوں کے زیادہ تر سپہ سالارراجپوت تھے اور مغل فوج میں٦٠ فیصد عناصر ہندو۔ جاٹ اور راجپوت تھے۔ اورنگ زیب کی مذہبی رواداری کا یہ عالم تھا کہ افغانستان کے صوبہ قندھار کے گورنر کی حیثیت سے راجہ جسونت سنگھ کا تقرر کیا گیا تھا۔ شیواجی کو ہتھیار ڈالنے پر مجبور کرکے گرفتار کرنے والے مغل جرنل جئے سنگھ تھے۔ یہ تاریخی حقائق ہیں جن سے ہر کوئی واقف نہیں۔ شیواجی کے گھڑ سوار دستے کے سب سے بڑے جنرل اسماعیل بیگ خان تھے اور پیشوا کے توپ خانہ کے جنرل ابراہیم خان گاردی تھے ۔ مسلم حکمرانوں کے طویل دور میں کبھی بھی اور کہیں بھی مذہبی عنصر نظر نہیں آتا۔ لیکن پھر بھی ساورکر کے نظریات سے متاثر موجودہ حکومت کے سربراہ اور ان کے حلقہ بگوش سیاسی کوچہ گرد سمجھتے ہیں کہ مسلم دورِ حکمرانی میں ہندوؤں پر آٹھ سو سالہ دور میں مظالم ہوئے جو کہ ایک غلط خیال ہے جس کا تاریخ سے دور دور تک تعلق نہیں۔ لہٰذا ان سیاسی کوچہ گردوں کے خیال میں اب آٹھ سو سالہ دور مظلومیت کا انتقام لینے کا وقت آگیا ہے اور اس خیال کا اظہار اکثر کٹر فرقہ پرست سوشیل میڈیا کے ذریعہ ہوتا رہتا ہے اور جن کی راست یا بالواسطہ حمایت حکومتِ وقت کرتی ہے۔ اس نفرت کی تازہ مثال مدھیہ پردیش کے نو تقرر شدہ چیف منسٹر کے احکامات ہیں کہ ساری ریاست میں گوشت‘ مرغ اور انڈوں کی کھلے عام فروخت پر پابندی عائد کی جائے۔ یہ حکم ایک طرح کی انتقامی کارروائی ہے اس حقیقت کے قطعِ نظر کہ گوشت کھانے والوں کی اکثریت کا تعلق اکثریتی طبقہ سے ہے۔ شہروں کے نام تبدیل کئے جارہے ہیں اور مسلم ناموں کو چن چن کر الگ کیا جارہا ہے۔ اورنگ آباد اور الہ آباد کی مثالیں آپ کے سامنے ہیں۔
حکومتِ وقت نے اپنے دو وعدوں کی تکمیل کردی۔ رام مندر کی تعمیر ‘ بابری مسجد کے مدفن پر ہوئی اور آرٹیکل٣٧٠ دستورِ ہند کو منسوخ کرکے کشمیریوں کو صلیب پر چڑھادیا۔ ان کے مراعات چھین لئے گئے۔ لوگ یہ سمجھ رہے تھے کہ اس فیصلہ کے خلاف اندرونِ ملک اور بیرون ملکاحتجاج ہوگا لیکن جو احتجاج چین نے کیا ہے وہ بہت ہی صحت مند احتجاج ثابت ہوسکتا ہے ماضی اور حال میں اس کی کئ مثالیں موجودہ ہیں ۔ چین نے کہا ہے کہ علاقہ لداخ پر اس کی علاقائی سالمیت پر کوئی اثر نہیں پڑے گا کیو ں کہ وہ علاقہ ہمارا ہے۔ اس بات کے امکان کو مسترد نہیں کیاجاسکتا ہے کہ حالیہ بھارتی سپریم کورٹ کا فیصلہ چین کے جارحانہ رویہ میں اور زیادہ شدت لائے گا اور شائد دونوں ممالک کی افواج میں ٹکراؤ بھی ہوسکتا ہے۔

Facebook Comments Box