ایم ایل ون منصوبہ، تیاریوں کا آخری مرحلہ مکمل، جولائی میں سنگِ بنیاد متوقع
اسلام آباد (صداۓ روس)
پاکستان ریلوے کے چیف ایگزیکٹو آفیسر عامر علی بلوچ نے کہا ہے کہ مین لائن ون (ایم ایل ون) کی اپ گریڈیشن کے لیے تیاریوں کا عمل آخری مرحلے میں داخل ہو چکا ہے اور طویل عرصے سے تاخیر کا شکار اس اہم منصوبے کا سنگِ بنیاد آئندہ جولائی میں رکھے جانے کا امکان ہے۔ یہ بات انہوں نے لاہور میں ریلوے ہیڈکوارٹرز میں ایشیائی ترقیاتی بینک (اے ڈی بی) کے وفد سے ملاقات کے دوران کہی۔ ملاقات میں اے ڈی بی کے وفد اور پاکستان ریلوے کے اعلیٰ حکام کے درمیان ایم ایل ون منصوبے کے دائرہ کار، ڈیزائن اور مالیاتی ساخت پر تفصیلی تبادلہ خیال کیا گیا۔ اجلاس کے دوران اے ڈی بی کے وفد نے منصوبے سے متعلق اپنی تکنیکی تجاویز اور مشاہدات چیف ایگزیکٹو آفیسر کے ساتھ شیئر کیے، جبکہ دونوں فریقوں نے منصوبے کی اہم جزئیات کو حتمی شکل دینے کے لیے آگے بڑھنے پر اتفاق کیا۔
ریلوے حکام کے مطابق لاہور میں ہونے والی یہ ملاقات اس وقت منعقد ہوئی جب اے ڈی بی کی ٹیم نے حال ہی میں کراچی سے روہڑی تک ریلوے لائن کا معائنہ کیا تھا۔ یہ 480 کلومیٹر طویل سیکشن ایم ایل ون منصوبے کے پہلے پیکج کا ایک نہایت اہم حصہ تصور کیا جاتا ہے۔ ایم ایل ون منصوبے کو پاکستان کے ریلوے نظام کی ریڑھ کی ہڈی قرار دیا جاتا ہے، جس کی تکمیل سے نہ صرف ٹرینوں کی رفتار اور استعداد میں اضافہ ہوگا بلکہ مال برداری اور مسافر آمد و رفت کے نظام میں بھی نمایاں بہتری متوقع ہے۔ 
