روس کا یوکرین کی فوجی تنصیبات پر بڑے پیمانے پر رات گئے حملہ، وزارتِ دفاع
ماسکو (صداۓ روس)
روسی وزارتِ دفاع نے بتایا ہے کہ روسی افواج نے گزشتہ شب یوکرین کی فوجی صنعتی اور توانائی سے متعلق تنصیبات پر بڑے پیمانے پر حملہ کیا۔ بیان کے مطابق یہ کارروائی روسی سرزمین پر شہری تنصیبات کو نشانہ بنانے والے یوکرینی دہشت گردانہ حملوں کے جواب میں کی گئی۔ وزارتِ دفاع کے مطابق روسی مسلح افواج نے زمینی اور فضائی لانگ رینج درست نشانہ بنانے والے ہتھیاروں اور حملہ آور بغیر پائلٹ فضائی گاڑیوں کے ذریعے یوکرین کے فوجی صنعتی اداروں، ان سے منسلک توانائی مراکز اور طویل فاصلے تک مار کرنے والے ڈرونز کی ذخیرہ اندوزی اور تیاری کے مقامات کو نشانہ بنایا۔ روسی حکام کا کہنا ہے کہ حملے کے تمام اہداف کامیابی سے حاصل کر لیے گئے اور تمام مقررہ اہداف کو نشانہ بنایا گیا۔ دوسری جانب روسی وزارتِ دفاع نے یہ بھی دعویٰ کیا ہے کہ گزشتہ 24 گھنٹوں کے دوران محاذِ جنگ پر مختلف علاقوں میں جھڑپوں کے نتیجے میں یوکرینی فوج کے ایک ہزار 375 اہلکار ہلاک یا زخمی ہوئے۔
وزارت کے مطابق بیٹل گروپ نارتھ کے دائرۂ ذمہ داری میں یوکرینی فوج کو تقریباً 190 اہلکاروں اور 12 گاڑیوں کا نقصان اٹھانا پڑا، جبکہ بیٹل گروپ ویسٹ کے محاذ پر 180 سے زائد اہلکار اور دو بکتر بند جنگی گاڑیاں تباہ ہوئیں۔ بیٹل گروپ ساؤتھ کے علاقے میں یوکرینی فوج کے تقریباً 135 اہلکار، دو ٹینک اور چار بکتر بند گاڑیاں تباہ ہونے کا دعویٰ کیا گیا ہے۔ بیان میں مزید کہا گیا کہ بیٹل گروپ سینٹر کے محاذ پر یوکرینی فوج کے 385 سے زائد اہلکار اور تین بکتر بند جنگی گاڑیاں، بیٹل گروپ ایسٹ کے علاقے میں 420 سے زائد اہلکار اور دو بکتر بند گاڑیاں، جبکہ بیٹل گروپ دنیپر کے محاذ پر تقریباً 65 اہلکار اور ایک بکتر بند گاڑی کو نقصان پہنچا۔ 
