ایلون مسک 800 ارب ڈالر سے زائد دولت رکھنے والے دنیا کے پہلے شخص
ماسکو(انٹرنیشنل ڈیسک)
ٹیسلا اور اسپیس ایکس کے بانی ایلون مسک تاریخ کے پہلے شخص بن گئے ہیں جن کی مجموعی دولت 800 ارب ڈالر سے بڑھ کر 852 ارب ڈالر تک پہنچ گئی ہے۔ فوربز میگزین نے یہ اطلاع دی ہے۔ مسک کی دولت میں یہ غیر معمولی اضافہ اسپیس ایکس کی جانب سے xAI کو حاصل کرنے کے بعد ہوا ہے۔ دونوں کمپنیوں کے انضمام کے بعد کمپنی کی مجموعی قدر 1.25 ٹریلین ڈالر ہو گئی جس سے مسک کو 84 ارب ڈالر کا اضافی فائدہ پہنچا۔
معاہدے سے قبل مسک کے پاس اسپیس ایکس کا تقریباً 42 فیصد حصہ تھا جو کمپنی کی 800 ارب ڈالر کی تخمینی قدر کے حساب سے 336 ارب ڈالر بنتا تھا۔ اسی طرح xAI میں ان کا 49 فیصد حصہ 122 ارب ڈالر کا تھا۔ انضمام کے بعد متحدہ کمپنی میں ان کا حصہ تقریباً 43 فیصد ہے جو 542 ارب ڈالر بنتا ہے اور یہ اب مسک کا سب سے بڑا اثاثہ ہے۔
یہ ایک سال سے کم عرصے میں مسک کی کمپنیوں کا دوسرا انضمام ہے۔ مارچ 2025 میں انہوں نے xAI کو سوشل میڈیا پلیٹ فارم X کے ساتھ ملایا تھا۔
فوربز کے مطابق گزشتہ چار ماہ میں مسک نے چار مرتبہ دولت کے نئے ریکارڈ قائم کیے ہیں۔ اکتوبر 2025 میں وہ پہلے شخص بنے جن کی دولت 500 ارب ڈالر سے تجاوز کر گئی، 15 دسمبر کو 600 ارب ڈالر، 19 دسمبر کو 700 ارب ڈالر اور اب 852 ارب ڈالر تک پہنچ گئے ہیں۔
اس وقت دنیا کے دوسرے امیر ترین شخص گوگل کے شریک بانی لاری پیج کی مجموعی دولت 281 ارب ڈالر ہے جو مسک سے 578 ارب ڈالر کم ہے۔ 
