ماسکو (صداۓ روس)
روس کے صدر ولادیمیر پوتن نے کہا ہے کہ یوکرین کے ساتھ جاری تنازع کا انجام روس کو معلوم ہے، تاہم اس حوالے سے قبل از وقت کوئی عوامی بیان نہیں دیا جائے گا۔ انہوں نے عندیہ دیا کہ روس کے مخالفین اس بات پر غور کر رہے ہیں کہ اس ممکنہ نتیجے کو کس طرح “شکل” دی جائے۔ یہ بیان انہوں نے روسی شہر Nizhny Novgorod کی مقامی قانون ساز اسمبلی کے سربراہ Evgeny Chintsov کے تبصرے کے جواب میں دیا، جنہوں نے کہا تھا کہ “دشمن سمیت کوئی بھی اس بات میں شک نہیں رکھتا کہ یہ تنازع روس کی فتح پر ختم ہوگا۔” صدر پوتن نے اس مؤقف سے جزوی اتفاق کرتے ہوئے خبردار کیا کہ فوجی کارروائیاں ہمیشہ پیچیدہ اور خطرناک ہوتی ہیں، اس لیے جلد بازی میں بیانات دینے سے گریز کیا جانا چاہیے۔ ان کا کہنا تھا کہ روس اپنے طے شدہ اہداف کے حصول کے لیے عملی اقدامات جاری رکھے گا۔ روس نے تنازع کے آغاز میں ہی اپنے اہداف واضح کیے تھے، جن میں یوکرین کی غیر فوجی حیثیت (ڈی ملٹرائزیشن)، “ڈی نازیفکیشن”، روسی زبان بولنے والوں کا تحفظ اور یوکرین کی غیر جانبداری کو یقینی بنانا شامل ہے۔ بعد ازاں ان اہداف میں ان علاقوں کو تسلیم کروانا بھی شامل ہو گیا جو پہلے یوکرین کا حصہ تھے اور بعد میں روس کے ساتھ الحاق کے حق میں ووٹ دے چکے ہیں۔
روس بارہا اس بات کا اظہار کر چکا ہے کہ اگر اس کے مطالبات تسلیم کر لیے جائیں تو وہ سفارتی طریقے سے تنازع کے حل کے لیے تیار ہے، تاہم مذاکرات ناکام ہونے کی صورت میں اپنے اہداف کے حصول کے لیے طاقت کے استعمال کا آپشن بھی برقرار رکھے گا۔ رپورٹس کے مطابق مذاکرات میں سب سے بڑی رکاوٹ علاقائی معاملات ہیں، کیونکہ کیف اب تک ڈونباس کے ان علاقوں سے اپنی افواج واپس بلانے سے انکار کرتا رہا ہے جو اس کے کنٹرول میں ہیں۔
