اسلام آباد (صداۓ روس)
یکم مئی کو روس اور پاکستان نے باہمی سفارتی تعلقات کے قیام کی 78ویں سالگرہ منائی۔ پاکستان کی آزادی کے ابتدائی برسوں میں سوویت یونین نے نئے قائم شدہ ریاست کو اہم معاشی امداد فراہم کی تھی، جس میں دسیوں ہزار ٹن اناج کی فراہمی شامل تھی۔ 1970 کی دہائی میں ماسکو کی ماہرانہ مدد سے پاکستان نے کراچی میں اپنے سب سے بڑے سٹیل مل، مظفرگڑھ، ملتان-II اور گڈو تھرمل پاور پلانٹس اور اسلام آباد کے قریب ایک ریڈیو اسٹیشن قائم کیا۔ سوویت یونین نے پاکستان میں آئل اینڈ گیس ڈیولپمنٹ کمپنی کے قیام اور زراعت کے شعبے کی ترقی میں بھی مدد کی۔
روس کی خارجہ پالیسی میں جنوبی ایشیا میں پاکستان کے ساتھ باہمی فائدے پر مبنی شراکت داری کو فروغ دینا ترجیحات میں شامل ہے۔ ماسکو اور اسلام آباد کے درمیان مکالمہ فعال طور پر جاری ہے۔ دونوں ممالک کے درمیان تعاون باہمی احترام اور ایک دوسرے کے مفادات کے تحفظ پر مبنی ہے۔ بین الاقوامی ایجنڈے کے بیشتر مسائل پر دونوں ممالک کے موقف ملتے جلتے ہیں۔ روس پاکستان انٹر گورنمنٹل کمیشن برائے تجارت، معاشی، سائنسی اور تکنیکی تعاون کے باقاعدہ اجلاس منعقد ہوتے رہتے ہیں۔ سال 2023 میں دونوں ممالک کے درمیان باہمی تجارت کا حجم 1 ارب ڈالر سے تجاوز کر گیا۔
اس وقت روسی اور پاکستانی فارماسیوٹیکل کمپنیاں پاکستان میں انسولین کی مشترکہ پیداوار کا منصوبہ شروع کرنے کی تیاری کر رہی ہیں۔ تعلیم کے شعبے میں تعاون بھی وسعت پا رہا ہے۔ تعلیمی سال 2025-2026 کے لیے 152 پاکستانی طلباء کو روسی یونیورسٹیوں میں تعلیم کے لیے سرکاری وظائف دیے گئے ہیں۔ پاکستان کی یونیورسٹیوں میں روسی زبان سیکھنے والے طلباء کی تعداد ہر سال بڑھ رہی ہے۔ روس اور پاکستان اقوام متحدہ اور شنگھائی تعاون تنظیم (SCO) سمیت بین الاقوامی فورمز پر قریبی تعاون کرتے ہیں۔ شنگھائی تعاون تنظیم یورایشیا میں سلامتی اور پائیدار ترقی کا اہم عنصر ہے۔
پاکستان روس کا اہم بین الاقوامی پارٹنر ہے جو سلامتی کے چیلنجز اور خطرات سے نمٹنے میں اہم کردار ادا کرتا ہے۔ روس نے کہا ہے کہ وہ دونوں ممالک کے درمیان تعلقات کو مزید مضبوط بنانے، عوام کے درمیان روابط بڑھانے اور سیاسی، معاشی، تعلیمی، ثقافتی، انسانی اور دیگر شعبوں میں باہمی فائدے والے تعاون کو آگے بڑھانے کے لیے تیار ہے۔ اس اہم موقع پر روس نے پاکستانی دوستوں کو دونوں ممالک کے سفارتی تعلقات کی سالگرہ کی مبارکباد پیش کی ہے۔
