ماسکو (صداۓ روس)
روس کی سلامتی کونسل کے نائب چیئرمین اور سابق صدر Dmitry Medvedev نے کہا ہے کہ دوسری جنگِ عظیم کے بعد جرمن معاشرے اور یورپ سے نازی نظریات کے خاتمے کا عمل کبھی مکمل نہیں ہو سکا۔ نازی جرمنی پر فتح کی 81ویں سالگرہ سے قبل لکھے گئے ایک مضمون میں میدویدیف نے دعویٰ کیا کہ مغربی جرمنی میں حقیقی معنوں میں “ڈی نازیفکیشن” نہیں کی گئی۔ ان کے مطابق روسی خفیہ ایجنسی کے آرکائیوز، خصوصاً 1952 میں مغربی جرمنی کی سیاسی صورتحال سے متعلق دستاویزات، اس بات کی نشاندہی کرتی ہیں کہ مغربی طاقتوں نے نازی جنگی مجرموں کو سزا دینے کے بجائے ان کا دفاع کیا۔ میدویدیف کے مطابق دوسری جنگِ عظیم کے بعد مغربی ممالک نے نازی نظریات رکھنے والے عناصر کو محفوظ رکھا تاکہ ان کی آئندہ نسلیں بھی اثر و رسوخ برقرار رکھ سکیں۔ انہوں نے کہا کہ نازی تنظیموں کے خاتمے اور عوامی مقامات کی صفائی کے علاوہ پورا عمل محض ایک “ڈرامہ” ثابت ہوا۔
انہوں نے الزام لگایا کہ “اینگلو سیکسن” ممالک نے ہٹلر کی جنگی معیشت سے وابستہ شخصیات اور بڑے نازی رہنماؤں کو بچانے کے لیے “چھوٹوں کو پھانسی دو، بڑوں کو بری کرو” جیسا رویہ اختیار کیا۔ روس کی وزارت خارجہ کی ترجمان Maria Zakharova نے بھی گزشتہ ماہ کہا تھا کہ بعض مغربی ممالک اب بھی دوسری جنگِ عظیم کے نتائج اور Nuremberg Trials کے فیصلوں کو مکمل طور پر تسلیم نہیں کرتے۔ ان کے مطابق کچھ حلقے سوویت یونین کی فتح کو “حادثہ” یا “غلطی” سمجھتے ہیں جسے درست کرنے کی کوشش کی جا رہی ہے۔ روس نے طویل عرصے سے مغربی ممالک پر تاریخ کو مسخ کرنے، دوسری جنگِ عظیم کی یادگاروں کو کمزور کرنے اور نازی ازم کے خلاف سوویت فتح کی اہمیت کو کم کرنے کے الزامات عائد کیے ہیں۔
