ماسکو (صداۓ روس)
روسی صدر ولادیمیر پوتن نے کہا ہے کہ اسٹاروبیلسک پر حملے کے ذمہ دار تمام افراد کو بالآخر انصاف کے کٹہرے میں لایا جائے گا اور انہیں اپنے اعمال کی سزا ضرور ملے گی۔ حکومتی اجلاس سے خطاب کرتے ہوئے صدر پوتن نے کہا کہ انہوں نے اس واقعے پر غور کے لیے خصوصی اجلاس طلب کیا ہے، جس میں روس کے پراسیکیوٹر جنرل اور تحقیقاتی کمیٹی کے چیئرمین کو بھی مدعو کیا گیا ہے۔ صدر پوتن نے اجلاس کے شرکاء سے کہا کہ وہ واقعے کے بارے میں اپنی تفصیلی رپورٹس اور ابتدائی نتائج پیش کریں، جبکہ حملے میں ملوث افراد کی شناخت اور گرفتاری کے لیے جاری تحقیقات سے بھی آگاہ کریں۔ انہوں نے زور دیتے ہوئے کہا کہ اس حملے میں ملوث تمام افراد سزا کے مستحق ہیں اور ان کی سزا ناگزیر ہے۔ صدر پوتن کے مطابق قانون نافذ کرنے والے ادارے ذمہ داران کا سراغ لگانے اور انہیں انصاف کے کٹہرے میں لانے کے لیے تمام ضروری اقدامات کر رہے ہیں۔ روسی صدر نے کہا کہ ریاست اس واقعے کو انتہائی سنجیدگی سے لے رہی ہے اور تحقیقات مکمل ہونے کے بعد ذمہ دار عناصر کے خلاف قانونی کارروائی عمل میں لائی جائے گی۔
