ماسکو(انٹرنیشنل ڈیسک)
تھائی لینڈ کے دارالحکومت بنکاک میں ایک مشہور پب میں آگ لگنے سے کم از کم 27 افراد ہلاک اور 63 زخمی ہو گئے . یہ واقعہ مقامی وقت کے مطابق اتوار کی درمیانی شب پیش آیا . ایمرجنسی سروسز کے مطابق آگ کی اطلاع آدھی رات کے قریب ملی، جب تک امدادی ٹیمیں پہنچیں، پوری عمارت آگ کی لپیٹ میں آ چکی تھی . سوشل میڈیا پر سامنے آنے والی ویڈیو فوٹیج میں پب کے دروازے سے بڑے شعلے اُٹھتے ہوئے دکھائی دے رہے ہیں . وزیراعظم نے موقع پر پہنچ کر 27 افراد کی ہلاکت کی تصدیق کی اور کہا کہ آگ کی وجوہات کی تحقیقات جاری ہیں . ذرائع کے مطابق پب میں موجود افراد میں سے بعض نے بیت الخلا کی طرف بھاگ کر پناہ لی تھی، لیکن وہیں دم توڑ دیا . آگ سے مزید 22 افراد شدید زخمی ہوئے ہیں، جنہیں ہسپتال میں داخل کرایا گیا ہے .
