پشاور : (صدائے روس)
پاکستان تحریک انصاف (پی ٹی آئی) کے رہنماء جنید اکبر نے اپنی پارٹی میں موجود مختلف دھڑوں کا کھلے عام اعتراف کیا ہے۔ انہوں نے کہا کہ پی ٹی آئی ایک ایسی پارٹی ہے جہاں ہر فرد کو آگے بڑھنے کا موقع ملتا ہے، اس لیے اختلاف رائے کا ہونا فطری بات ہے۔
جنید اکبر نے میڈیا سے گفتگو کرتے ہوئے کہا کہ پی ٹی آئی میں اختلافات معمول کی بات ہیں، کیونکہ پارٹی کے اندر ہر کسی کو ترقی کے مواقع ملتے ہیں، جس کی وجہ سے بعض اوقات مختلف نظریات اور سوچ رکھنے والے دھڑے بن جاتے ہیں۔ ان کا کہنا تھا کہ “پارٹی میں جس شخص پر بانی پی ٹی آئی عمران خان کا ہاتھ ہوتا ہے، وہی آگے بڑھتا ہے۔”
جنید اکبر نے اس بات کا بھی اعتراف کیا کہ پی ٹی آئی میں اب وہ لوگ نہیں ہیں جن کے ذاتی ووٹ تھے، کیونکہ وہ سب پارٹی چھوڑ چکے ہیں۔ انہوں نے مزید کہا کہ “اب پارٹی میں صرف بانی عمران خان اور اس کے ورکرز موجود ہیں۔” ان کا کہنا تھا کہ “اب پی ٹی آئی میں کوئی بڑا نام نہیں رہ گیا، سب ہمارے جیسے عام لوگ ہیں۔”
جنید اکبر نے اس بات کو بھی تسلیم کیا کہ خیبرپختونخواہ سے ابھی بھی لوگ پارٹی چھوڑ رہے ہیں، اور کہا کہ “ہمارے ورکرز کو ڈرا دھمکا کر پارٹی چھوڑنے پر مجبور کیا جاتا ہے۔” تاہم، انہوں نے پنجاب کے حالات پر سوال اٹھایا اور کہا کہ “پنجاب کے لوگ کیوں نہیں نکل رہے؟ اس سوال کا جواب پنجاب کی قیادت سے پوچھا جائے۔”
خیبرپختونخواہ کے وزیراعلٰی علی امین گنڈاپور کی طرف سے پی ٹی آئی کے بعض رہنماؤں پر سازش کرنے کا الزام عائد کرنے کے بعد پارٹی میں اختلافات کی خبریں سامنے آئیں۔ اس کے بعد، پی ٹی آئی کے رکن قومی اسمبلی شہرام خان ترکئی نے علی امین گنڈاپور کے بیان کی تحقیقات کا مطالبہ کیا۔
اس کے علاوہ، پی ٹی آئی کے چیئرمین بیرسٹر گوہر نے پارٹی میں بڑھتے ہوئے اختلافات کے تناظر میں رہنماؤں کو میڈیا میں بیان بازی سے روک دیا۔ بیرسٹر گوہر کا کہنا تھا کہ “آئندہ پارٹی عہدیدار عوامی سطح پر اختلافات کا اظہار نہیں کریں گے اور پارٹی اپنے تمام معاملات مناسب فورم پر ہی حل کرے گی۔”
بیرسٹر گوہر نے پی ٹی آئی کے اعلیٰ رہنماؤں علی امین گنڈاپور، اسد قیصر، اور تیمور جھگڑا سے رابطہ کر کے انہیں میڈیا پر بیانات دینے سے روک دیا اور کہا کہ آئندہ تمام پارٹی مسائل کو مناسب فورمز پر حل کیا جائے گا۔
