ماسکو(انٹرنیشنل ڈیسک)
پاکستان میں جاری شدید بارشوں نے ملک کے مختلف علاقوں خاص طور پر پہاڑی علاقوں میں تباہی مچا دی ہے۔ قومی ادارۂ آفات نے پیش گوئی کی ہے کہ آنے والے دنوں میں مزید بارشیں متوقع ہیں، جس سے پہاڑی علاقوں کے دریاؤں میں طغیانی اور زیریں علاقوں میں سیلاب کا خطرہ بڑھ گیا ہے۔ حکام نے عوام کو ہدایت کی ہے کہ وہ احتیاطی تدابیر اختیار کریں اور کمزور علاقوں میں رہائش سے گریز کریں ۔
خیبرپختونخوا میں شدید بارشوں اور سیلابی صورتحال کے باعث سب سے زیادہ نقصان ہوا ہے، جہاں گزشتہ 24 گھنٹوں کے دوران مختلف واقعات میں 6 افراد ہلاک اور 19 زخمی ہوئے ہیں، جبکہ 30 سے زائد مکانات گر گئے یا انہیں نقصان پہنچا ۔ دوسری جانب پنجاب کے ضلع اٹک میں ایک دیوار گرنے سے 2 افراد ہلاک جبکہ بلوچستان کے ضلع ژوب میں تیز ہواؤں کے باعث چھت گرنے سے 3 افراد ہلاک ہوئے ۔
سائنسدانوں کے مطابق پاکستان میں موسمیاتی تبدیلیوں کے باعث مون سون کی بارشیں غیر متوقع اور شدید ہو گئی ہیں، جس سے سیلاب اور پہاڑی ندیوں میں طغیانی جیسے خطرات بڑھ گئے ہیں ۔ حالیہ برسوں میں پاکستان میں آنے والے شدید سیلابوں نے ان خطرات کی سنگینی کو مزید واضح کر دیا ہے ۔
ریسکیو حکام نے متاثرہ علاقوں میں امدادی کارروائیاں شروع کر دی ہیں اور عوام سے اپیل کی ہے کہ وہ بارشوں اور سیلابی صورتحال کے پیش نظر غیر ضروری سفر سے گریز کریں اور محفوظ مقامات کا رخ کریں ۔
