ماسکو(انٹرنیشنل ڈیسک)
روسی وزیر خارجہ سرگئی لاوروف نے الزام عائد کیا ہے کہ نیٹو آرکٹک کو روس اور اس کے شراکت داروں کے خلاف مقابلے کا ایک نیا میدان بنانا چاہتا ہے۔ انہوں نے ایک مضمون میں کہا کہ نیٹو اور دیگر مغربی ممالک اپنے حقیقی مقاصد کو چھپاتے نہیں ہیں اور آرکٹک کو روس اور اس کے ہم خیال شراکت داروں کی ترقی کے خلاف ایک نیا محاذ بنانے کا کھلے عام اعلان کر رہے ہیں۔ لاوروف نے کہا کہ روس آرکٹک میں امن اور استحکام کو برقرار رکھنے اور قومی سلامتی کے خطرات کو کم کرنے کے لیے پرعزم ہے۔ انہوں نے مغربی ممالک کی روس کی شرکت کے بغیر آرکٹک کے مسائل پر بات کرنے کی کوششوں کو تنقید کا نشانہ بناتے ہوئے کہا کہ وہ آرکٹک کونسل کو بدنام اور پسماندہ کر رہے ہیں۔ لاوروف نے کہا کہ روس کے پاس اس منظرنامے کے لیے علاقہ، لاجسٹکس، ٹیکنالوجی اور قابل اعتماد شراکت دار ہیں تاکہ باہمی فائدہ مند منصوبوں کو آگے بڑھایا جا سکے۔
