ماسکو (صداۓ روس)
پاکستان نے روس سے بنگلہ دیش کے جوہری بجلی گھر کے لیے خصوصی ایندھن لے جانے والے روسی طیارے کی پرواز کی اجازت روک دی، جس کے باعث پلانٹ کو ایندھن کی پہلی کھیپ کی ترسیل میں تاخیر ہوئی۔ ذرائع کے مطابق اسلام آباد نے پرواز کی اجازت روکنے کے لیے ’’تکنیکی اور ضابطہ جاتی وجوہات‘‘ کا حوالہ دیا ہے، تاہم اجازت نہ دینے کی مخصوص وجوہات فی الحال سامنے نہیں لائی گئیں۔ ڈھاکا میں پاکستانی ہائی کمیشن نے دی اکنامک ٹائمز کو بتایا کہ پرواز کی اجازت سے متعلق معاملہ فضائی راستے اور ضروری اجازت ناموں سے متعلق معمول کے ’’تکنیکی اور ضابطہ جاتی‘‘ امور کی وجہ سے پیش آیا۔ ہائی کمیشن نے زور دیا کہ اس واقعے کو پاکستان اور بنگلہ دیش کے درمیان سیاسی اختلاف کے طور پر نہیں دیکھا جانا چاہیے۔
بنگلہ دیش کی وزارت سائنس و ٹیکنالوجی نے بھی ایندھن کی ترسیل میں تاخیر کی تصدیق کرتے ہوئے بتایا کہ ایئرپورٹ پر زمینی سطح کی تمام تیاریاں مکمل تھیں، تاہم فضائی حدود کے استعمال کی اجازت نہ ملنے کی اطلاع موصول ہوگئی۔ روسی جوہری توانائی کارپوریشن روس ایٹم نے کہا ہے کہ جوہری بجلی گھر کے دوسرے یونٹ کے لیے ایندھن کی ترسیل اکتوبر میں متبادل فضائی راستوں کے ذریعے دوبارہ شروع کی جائے گی۔ روس ایٹم کے مطابق باقی ایندھن کی کھیپیں دسمبر تک سات مال بردار پروازوں کے ذریعے بنگلہ دیش پہنچانے کا منصوبہ ہے۔
