تاشقند (صدائے روس) ازبکستان کے دارالحکومت تاشقند میں نوجوان صحافیوں اور بلاگرز کے لیے بین الاقوامی میڈیا اسکول «مستقبل کے نوجوان، ڈیجیٹل ٹیکنالوجی اور تخلیقی حل» کا تیسرا مرحلہ مکمل ہوگیا۔ دو روزہ پروگرام میں آرمینیا، بیلاروس، قازقستان، کرغزستان، روس اور ازبکستان کے نوجوان صحافیوں اور بلاگرز نے شرکت کی۔ پروگرام کا مرکزی موضوع «میڈیا 2026، انسان، مصنوعی ذہانت اور توجہ کی نئی معیشت» تھا۔ اختتامی نشست میں شرکا نے اپنے تیار کردہ میڈیا منصوبے پیش کیے۔
افتتاحی تقریب سے مرکز برائے سیاسی مطالعات «شمال جنوب» کی ایگزیکٹو ڈائریکٹر انژلیکا تراپیزنیکووا اور ازبکستان میں سائنس و تعلیم کے فروغ کی فاؤنڈیشن «ضیا فورم» کے ڈائریکٹر کے ترجمان اور فاؤنڈیشن کے یوتھ سینٹر کے سربراہ سراج الدین بازاروف نے خطاب کیا۔ انژلیکا نے کہا کہ میڈیا اسکول مختلف ممالک کے نوجوانوں کو ایک ساتھ کام کرنے اور حقیقی کہانیوں اور براہِ راست گفتگو کے ذریعے ایک دوسرے کے معاشروں کو سمجھنے کا موقع فراہم کرتا ہے۔ ان کے مطابق ایسی ملاقاتوں کی اصل قدر اس وقت سامنے آتی ہے جب ان سے اعتماد، پیشہ ورانہ روابط اور مشترکہ منصوبوں کی بنیاد پڑتی ہے۔ سراج الدین بازاروف نے کہا کہ عملی تربیت کے ساتھ مختلف ملکوں کے نوجوانوں کا مل کر کام کرنا بھی اس پروگرام کا اہم حصہ ہے، جس کا فائدہ تربیت مکمل ہونے کے بعد بھی برقرار رہتا ہے۔
تربیتی پروگرام کا آغاز اس سوال پر مباحثے سے ہوا کہ ناظرین کی توجہ پر زیادہ اثر کس کا ہے، مواد بنانے والے کا، ڈیجیٹل پلیٹ فارم کا یا مصنوعی ذہانت کا۔ مباحثے کی نظامت آرٹ لیبیدیف میڈیا کے سربراہ اور میڈیا پروڈیوسر نکیتا دیمینکوف اور قازقستان کے سماجی و سیاسی امور کے ماہر رستم قائیرییف نے کی۔ مباحثے میں پروفیسر نتالیہ خاریتونووا، تاشقند کی اشتہاری ایجنسی فیسز کی بانی سبینا باکیوا، ویڈیو پروڈکشن ادارے دوخوف میڈیا کے شریک بانی سرگئی اور میخائل دوخوف، اور کرغزستان کی عوامی اسمبلی کی نوجوانوں کی تنظیم کے سربراہ یونس جان الاخونوف نے حصہ لیا۔
نکیتا دیمینکوف نے کہا کہ ڈیجیٹل پلیٹ فارم کا الگورتھم کسی خبر یا ویڈیو کو ناظرین تک پہنچا سکتا ہے، مگر یہ فیصلہ مواد تیار کرنے والے کو خود کرنا ہوتا ہے کہ کوئی کہانی کیوں سنائی جائے۔ سرگئی اور میخائل دوخوف نے کہا کہ مصنوعی ذہانت نے ویڈیو، تصاویر اور تحریر تیار کرنا تیز اور کم خرچ بنا دیا ہے، جبکہ ناظرین کے پاس انہیں دیکھنے اور پڑھنے کا وقت محدود ہے۔ نتالیہ خاریتونووا نے کہا کہ جب صحافی اپنے ذرائع اور معلومات کی تصدیق کا طریقہ واضح کرتا ہے تو قاری اس کے نتائج کو خود پرکھ سکتا ہے۔ ان کے مطابق مصنوعی ذہانت سے بظاہر اصلی دکھائی دینے والا جعلی مواد تیار کرنا آسان ہوگیا ہے، اس لیے تصدیق کا طریقہ بتانا صحافی کی پیشہ ورانہ ذمہ داری کا حصہ ہے۔
سبینا باکیوا نے کہا کہ پلیٹ فارم کسی اشاعت کی رسائی بڑھا سکتا ہے اور کوئی تجارتی ادارہ اس کی تیاری کے لیے وسائل مہیا کر سکتا ہے، لیکن ناظرین اسی تخلیق کار کی طرف واپس آتے ہیں جس پر انہیں اعتماد ہو۔ یونس جان الاخونوف نے کہا کہ مختلف ملکوں کے شرکا جب ایک ہی خبر یا ویڈیو پر مل کر بات کرتے ہیں تو انہیں اندازہ ہوتا ہے کہ ایک کہانی کو مختلف معاشروں میں کس طرح سمجھا جا سکتا ہے۔ ان کے مطابق یہ تجربہ ایک دوسرے کا نقطۂ نظر سمجھنے اور آئندہ مشترکہ منصوبوں پر کام کرنے میں مدد دیتا ہے۔
مباحثے کے بعد رستم قائیرییف کی عملی ورکشاپ میں شرکا نے روزمرہ زندگی سے ایسے کردار اور واقعات تلاش کیے جن کے ذریعے وہ اپنے ملک کی کہانی غیر ملکی ناظرین کو سنا سکیں۔ ایک مشق میں انہیں صرف ایک منظر چننا تھا اور 30 سیکنڈ میں بتانا تھا کہ انہوں نے اسے کیوں منتخب کیا۔ رستم قائیرییف نے کہا کہ کسی ملک کی کہانی اس کے لوگوں سے شروع ہوتی ہے اور ان کی روزمرہ زندگی بھی ملک کو سمجھنے کا ذریعہ بن سکتی ہے۔
نتالیہ خاریتونووا کی ورکشاپ میں شرکا نے کسی تصویر یا پیغام کا اصل ماخذ تلاش کرنے، ذریعے کی جانچ کرنے اور تصدیق شدہ حقیقت کو قیاس سے الگ رکھنے کی مشق کی۔ انہوں نے حساس موضوعات کی رپورٹنگ میں غیر جانب دار الفاظ استعمال کرنے اور یہ دیکھنے پر زور دیا کہ وہی الفاظ دوسری زبان میں کس مفہوم کے ساتھ منتقل ہوں گے۔ سبینا باکیوا نے اپنی ورکشاپ میں کسی تجارتی ادارے کے ساتھ میڈیا مواد تیار کرنے کے مراحل سمجھائے، جن میں ابتدائی بات چیت، اسکرپٹ، اشاعت، ضروری ترامیم اور نتائج کا جائزہ شامل تھا۔ انہوں نے کہا کہ کسی مصنوع کو کہانی میں شامل کرتے وقت تخلیق کار کو اپنا انداز اور ناظرین کا اعتماد برقرار رکھنا چاہیے۔
دوسرے روز سرگئی اور میخائل دوخوف نے 2027 میں میڈیا اور مواد کی تیاری کے رجحانات پر تربیتی نشست کی۔ انہوں نے میڈیا منصوبوں اور اشتہاری مہمات کی مثالوں سے سمجھایا کہ زیادہ لوگوں تک پہنچ جانا کسی مہم کی کامیابی کا مکمل پیمانہ نہیں ہوتا۔ شرکا نے یہ بھی دیکھا کہ کمپنیاں اپنے میڈیا فارمیٹ کیسے تیار کرتی ہیں اور کس قسم کی کہانیاں ناظرین کو دوبارہ ان کی طرف لاتی ہیں۔
نکیتا دیمینکوف نے سوشل میڈیا پر پیشہ ورانہ شناخت بنانے کی تربیت دی، جس میں مناسب پلیٹ فارم کا انتخاب، باقاعدگی سے کام اور اپنی دلچسپی اور مہارت کے مطابق موضوع تلاش کرنے پر بات ہوئی۔ اس کے بعد قازقستان سے تعلق رکھنے والی ڈیجیٹل مواد کی تخلیق کار کارینا اورازالیوا نے مختصر ویڈیو کی ورکشاپ کرائی۔ شرکا نے ویڈیو کا مرکزی خیال طے کرنے، ابتدائی منظر منتخب کرنے، آواز اور تدوین پر کام کیا اور پھر ان طریقوں کو عملی مشق میں آزمایا۔ کارینا اورازالیوا نے کہا کہ ویڈیو کے ابتدائی چند سیکنڈ ناظر کی توجہ حاصل کرتے ہیں، جبکہ موضوع میں دلچسپی اسے آخر تک ویڈیو دیکھنے پر آمادہ کرتی ہے۔
پروگرام کے اختتام پر شرکا نے انفرادی اور اجتماعی طور پر تیار کیے گئے میڈیا منصوبے پیش کیے۔ انہوں نے اپنے موضوع، کردار اور پیشکش کا طریقہ خود منتخب کیا، معلومات کی تصدیق کی اور جیوری کے سامنے اپنے انتخاب کی وجہ بیان کی۔ جیوری نے منصوبوں پر رائے دی، بہترین کام کو انعامات سے نوازا گیا اور شرکا کو اسناد دی گئیں۔
میڈیا اسکول کا اہتمام مرکز برائے سیاسی مطالعات «شمال جنوب» نے ازبکستان کی سائنس و تعلیم کے فروغ کی فاؤنڈیشن «ضیا فورم» کے اشتراک سے کیا۔ پروگرام کو دولتِ مشترکہ کے آزاد ممالک کے بین الریاستی فنڈ برائے انسانی تعاون کی معاونت حاصل تھی۔