اسلام آباد (صداۓ روس)
پاک افواج، خصوصاً پاک فضائیہ نے معرکۂ حق کی پہلی سالگرہ کے موقع پر قومی دفاع کی کامیابیوں کو خراجِ تحسین پیش کرتے ہوئے کہا ہے کہ اس معرکے نے قومی اعتماد کو نئی جدت اور قوت بخشی ہے۔ پاک فوج کے شعبۂ تعلقات عامہ Inter-Services Public Relations کے مطابق معرکۂ حق نے پاک فضائیہ کی جدید جنگی تیاریوں اور پیشہ ورانہ صلاحیتوں کو دنیا پر ثابت کیا۔ آئی ایس پی آر کے بیان میں کہا گیا کہ پاک فضائیہ جدید ٹیکنالوجی اور اعلیٰ جنگی صلاحیتوں کے ذریعے مستقبل کی ایک مؤثر فضائی قوت کے طور پر ابھر رہی ہے۔ ملٹی ڈومین آپریشنز میں مہارت نے پاک فضائیہ کو جدید جنگی تقاضوں سے ہم آہنگ، مؤثر اور فیصلہ کن فورس بنا دیا ہے۔
ترجمان کے مطابق پاک فضائیہ کی کامیابیوں نے پاکستانی قوم کے اعتماد، حوصلے اور جذبۂ حب الوطنی کو مزید مضبوط کیا ہے۔ بیان میں کہا گیا کہ پاکستان ایک امن پسند ملک ہے اور پاک افواج ذمہ دارانہ اور پختہ اسٹریٹجک سوچ کی حامل ہیں۔ پاک افواج کی ہر تیاری اور ہر کوشش کا محور خطے میں امن اور استحکام کا فروغ ہے۔
آئی ایس پی آر نے مزید کہا کہ پاکستان کے لیے امن ہمیشہ عزت، وقار اور برابری کے اصولوں سے وابستہ رہا ہے، جبکہ پاک افواج خطے کی بدلتی ہوئی جیوپولیٹیکل صورتحال اور دشمن کی جارحانہ عسکری تیاریوں سے مکمل طور پر باخبر ہیں۔
بیان میں کہا گیا کہ پاک فوج جدید ٹیکنالوجی اور پیشہ ورانہ مہارت میں مسلسل سرمایہ کاری کر رہی ہے اور مستقبل کے جنگی ماحول کے لیے پہلے سے زیادہ تیار اور مستعد ہے۔ کسی بھی جارحیت کا جواب پہلے سے زیادہ طاقت، درستگی اور عزم کے ساتھ دیا جائے گا۔
آئی ایس پی آر کے مطابق معرکۂ حق کے دوران دشمن نے پاکستان کی قوت اور فیصلہ کن صلاحیت کا عملی مشاہدہ کیا، جبکہ آئندہ کسی بھی مہم جوئی کا جواب اس سے بھی زیادہ سخت ہوگا۔ ترجمان نے کہا کہ پاک فضائیہ نے پاکستان کی فضائی حدود کے تاریخی دفاع میں کلیدی کردار ادا کیا اور اس کی جرات، تیاری اور بروقت کارروائی عسکری تاریخ کا روشن باب بن چکی ہے۔
بیان میں مزید کہا گیا کہ پاک فضائیہ نے دشمن کے ناپاک عزائم کو ناکام بنا کر قومی سلامتی کو ناقابلِ تسخیر بنایا، جبکہ جدید جنگی صلاحیت اور غیر متزلزل عزم کے باعث پاک فضائیہ دنیا میں ایک نمایاں مقام رکھتی ہے اور ہمیشہ قوم کے لیے فخر، طاقت اور اعتماد کی علامت بنی رہے گی۔
