پوتن اور ٹرمپ نومبر میں مل سکتے ہیں، کریملن

ماسکو (صداۓ روس)

روسی صدر ولادیمیر پوتن اور امریکی صدر ڈونلڈ ٹرمپ نومبر میں چین میں ہونے والے APEC سربراہی اجلاس کے موقع پر ملاقات کر سکتے ہیں۔ کریملن کے فارن پالیسی ایڈوائزر یوری اوشاکوف نے بدھ کو صحافیوں سے گفتگو کرتے ہوئے کہا کہ “اگر دونوں رہنما چین میں موجود ہوں گے تو وہ ملاقات کر سکتے ہیں۔” تاہم انہوں نے واضح کیا کہ ابھی تک اس ملاقات کی کوئی حتمی منصوبہ بندی نہیں ہوئی ہے۔ اوشاکوف نے بتایا کہ پوتن نے چینی صدر شی جن پنگ سے ملاقات کے دوران تصدیق کی ہے کہ وہ 18-19 نومبر کو شینزین میں ہونے والے APEC سربراہی اجلاس میں شرکت کریں گے۔ ٹرمپ نے بھی اس اجلاس میں شرکت کی خواہش ظاہر کی ہے۔ کریملن ایڈوائزر نے کہا کہ “ابھی تک اس ملاقات پر کوئی اتفاق نہیں ہوا، لیکن اگر ایسا موقع بنتا ہے تو اس سے انکار کا امکان نہیں ہے۔” یاد رہے کہ اگست 2025 میں الاسکا میں پوتن اور ٹرمپ کے درمیان پہلی آمنے سامنے ملاقات ہوئی تھی۔