ہیلسنکی (انٹرنیشنل ڈیسک)
فن لینڈ کی پارلیمنٹ نے ایک اہم قانون منظور کرتے ہوئے ملک میں جوہری ہتھیاروں کی درآمد، نقل و حمل، ترسیل اور ذخیرہ کرنے پر عائد طویل عرصے سے قائم پابندی ختم کر دی ہے۔ پارلیمنٹ میں اس قانون کے حق میں 125 جبکہ مخالفت میں 61 ووٹ ڈالے گئے۔ قانون میں ترمیم کے بعد اب فن لینڈ کی سرزمین سے جوہری ہتھیاروں کی منتقلی اور ان کا ذخیرہ ممکن ہو سکے گا۔ حکومتی حلقوں کا کہنا ہے کہ یہ اقدام ملک اور نیٹو کی اجتماعی سلامتی کو مضبوط بنانے کے لیے کیا گیا ہے۔ فن لینڈ کے وزیر دفاع Antti Hakkanen نے فیصلے کا خیرمقدم کرتے ہوئے کہا کہ یہ تاریخی اصلاحات فن لینڈ اور NATO دونوں کی سلامتی میں اضافہ کریں گی۔
یہ پیش رفت ایسے وقت میں سامنے آئی ہے جب فن لینڈ نے 2023 میں اپنی طویل فوجی غیرجانبداری کی پالیسی ترک کرتے ہوئے نیٹو میں شمولیت اختیار کی تھی۔ نیٹو میں شمولیت کے بعد فن لینڈ اور Russia کے تعلقات میں نمایاں کشیدگی دیکھی گئی ہے۔ دونوں ممالک کے درمیان تقریباً 1340 کلومیٹر طویل مشترکہ سرحد موجود ہے۔ روسی حکام پہلے ہی اس قانون میں تبدیلی پر تحفظات کا اظہار کر چکے تھے۔ کریملن کے ترجمان Dmitry Peskov نے خبردار کیا تھا کہ فن لینڈ میں جوہری ہتھیاروں کی موجودگی یورپ میں کشیدگی میں اضافے کا باعث بن سکتی ہے اور روس کو اس کے مطابق اقدامات کرنے پڑیں گے۔
دوسری جانب فن لینڈ کے صدر Alexander Stubb نے کہا ہے کہ ان کی حکومت کا ملک میں مستقل بنیادوں پر جوہری ہتھیار تعینات کرنے کا کوئی منصوبہ نہیں ہے۔ تاہم وزیر اعظم Petteri Orpo نے حال ہی میں اشارہ دیا تھا کہ فن لینڈ فرانس کے اس دفاعی منصوبے میں دلچسپی رکھتا ہے جس کے تحت فرانسیسی جوہری صلاحیت رکھنے والے لڑاکا طیارے اتحادی ممالک کے فضائی اڈوں پر تعینات کیے جا سکتے ہیں۔
قانون کے ناقدین نے اس فیصلے کو خطرناک قرار دیا ہے۔ یورپی پارلیمنٹ کے امیدوار Armando Mema نے کہا کہ یہ فن لینڈ کی تاریخ کی ایک بڑی غلطی ہے جو ملک کو زیادہ محفوظ بنانے کے بجائے ممکنہ طور پر جوہری حملوں کا ہدف بنا سکتی ہے۔
