فرانس میں شدید گرمی سے بجلی کا نظام متاثر، ہزاروں گھر اندھیرے میں ڈوب گئے

ماسکو(انٹرنیشنل ڈیسک)

یورپ بھر میں جاری ریکارڈ توڑ گرمی کی لہر نے فرانس میں بجلی کے نظام کو بھی شدید متاثر کر دیا ہے، جہاں شمال مغربی علاقوں میں تقریباً 68 ہزار گھروں کی بجلی منقطع ہو گئی۔ فرانسیسی حکام کے مطابق ساحلی علاقے فنیسٹرے میں بجلی کے گرڈ سے منسلک ایک اہم ٹرانسفارمر شدید گرمی کے باعث متاثر ہوا، جس کے نتیجے میں شہر کیمپر اور اس کے نواحی علاقوں میں منگل کی شب بجلی کی فراہمی اچانک معطل ہو گئی۔ بجلی کی بندش سے ہزاروں رہائشی اور کاروباری مراکز متاثر ہوئے۔ حکام کا کہنا ہے کہ بجلی کے نظام کی بحالی کے لیے گرڈ آپریٹرز اور تکنیکی ٹیمیں رات بھر کام کرتی رہیں، تاہم مکمل بحالی بدھ کے اختتام سے قبل ممکن ہونے کا امکان نہیں ہے۔ ادھر فرانسیسی محکمہ موسمیات نے ملک کے 58 علاقوں کے لیے شدید گرمی کا ریڈ الرٹ جاری کر دیا ہے۔ پیش گوئی کے مطابق متاثرہ علاقوں میں درجہ حرارت 39 سے 41 ڈگری سینٹی گریڈ تک پہنچ سکتا ہے، جبکہ بعض مقامات پر گرمی کی شدت اس سے بھی زیادہ محسوس ہونے کا خدشہ ظاہر کیا جا رہا ہے۔ فرانس سمیت یورپ کے متعدد ممالک اس وقت غیرمعمولی گرمی کی لپیٹ میں ہیں۔ ماہرین کے مطابق حالیہ ہیٹ ویو نے توانائی کے نظام، ٹرانسپورٹ نیٹ ورک اور عوامی صحت کے شعبوں پر اضافی دباؤ ڈال دیا ہے۔ حکام نے شہریوں کو غیر ضروری سفر سے گریز، زیادہ پانی پینے اور بزرگوں، بچوں اور بیمار افراد کا خصوصی خیال رکھنے کی ہدایت کی ہے۔

ماہرین موسمیات نے خبردار کیا ہے کہ اگر شدید گرمی کا سلسلہ جاری رہا تو بجلی کی طلب میں مزید اضافہ اور انفراسٹرکچر پر اضافی دباؤ پیدا ہو سکتا ہے، جس سے مزید علاقوں میں بجلی کی فراہمی متاثر ہونے کا خطرہ موجود ہے۔