ماسکو (صداۓ روس)
روس کے جدید مسافر بردار طیارے MC-21 نے سرٹیفکیشن کے اہم پروازی تجربات کے دوران 3,800 کلومیٹر تک پرواز کی صلاحیت کا کامیاب مظاہرہ کرتے ہوئے ایک اور اہم سنگ میل عبور کر لیا ہے۔ روسی حکام کے مطابق طیارے نے طویل فاصلے کے سرٹیفکیشن ٹیسٹ مکمل کیے، جن میں 175 مسافروں کے مساوی مکمل بوجھ کی نقل تیار کی گئی تھی۔ تجربات کا مقصد مختلف عملی حالات میں طیارے کی کارکردگی، ایندھن کی کھپت اور حفاظتی معیار کا جائزہ لینا تھا۔ ان آزمائشی پروازوں کے دوران انجینئرز نے تصدیق کی کہ طیارہ بین الاقوامی تقاضوں کے مطابق مطلوبہ ایندھن ذخیرہ برقرار رکھنے کی صلاحیت رکھتا ہے۔ ماہرین نے مختلف حقیقی پروازی پروفائلز کے تحت اس کی کارکردگی کا جائزہ لیا اور نتائج کو تسلی بخش قرار دیا۔ ٹیسٹوں کے دوران ایک انجن کے ناکام ہونے کی فرضی صورتحال بھی پیدا کی گئی، جس میں ایم سی-21 نے محفوظ انداز میں ٹیک آف اور پرواز جاری رکھنے کی صلاحیت کا کامیاب مظاہرہ کیا۔ اس تجربے کو طیارے کی حفاظتی قابلیت کے حوالے سے اہم پیش رفت قرار دیا جا رہا ہے۔
روسی حکام کا کہنا ہے کہ ان کامیاب تجربات سے ملکی فضائی صنعت کو مزید تقویت ملے گی اور روس کی ہوابازی میں خود انحصاری کی حکمت عملی کو آگے بڑھانے میں مدد ملے گی۔ ماسکو طویل عرصے سے مغربی ساختہ مسافر طیاروں پر انحصار کم کرنے اور مقامی طور پر تیار کردہ جدید طیاروں کے استعمال کو فروغ دینے کی کوشش کر رہا ہے۔ ماہرین کے مطابق ایم سی-21 پروگرام روس کے ان بڑے منصوبوں میں شامل ہے جن کا مقصد ملکی ایئرلائنز کے لیے جدید اور مکمل طور پر روسی ٹیکنالوجی پر مبنی فضائی بیڑا فراہم کرنا ہے۔
