ماسکو(انٹرنیشنل ڈیسک)
آئرلینڈ نے دوسرے ٹی ٹوئنٹی میں بھارت کو سنسنی خیز مقابلے کے بعد ایک رن سے شکست دے کر دو میچوں کی سیریز 0-2 سے وائٹ واش کر دی۔ اس کامیابی کے ساتھ ہی عالمی چیمپئن بھارت کی تقریباً 3 برسوں پر محیط 16 مسلسل ٹی ٹوئنٹی سیریز میں ناقابل شکست رہنے کی روایت بھی ختم ہو گئی۔ پہلے بیٹنگ کرتے ہوئے آئرلینڈ نے 8 وکٹوں کے نقصان پر 154 رنز بنائے۔ ہیری ٹیکٹر نے 53 رنز کی ذمہ دارانہ اننگز کھیلی جبکہ بین کیلٹز کے ساتھ ان کی 65 رنز کی شراکت اہم رہی۔ بھارت کی جانب سے پرنس نے ڈیبیو پر 3 وکٹیں حاصل کیں۔ 155 رنز کے ہدف کے تعاقب میں بھارتی اننگز کا آغاز انتہائی مایوس کن رہا۔ جے مونڈرا نے پہلی ہی گیند پر سنجو سیمپسون کو آؤٹ کیا اور ابھیشیک شرما کو بھی گولڈن ڈک پر واپس بھیج دیا۔
ٹی ٹوئنٹی کی تاریخ میں یہ صرف چوتھا موقع تھا جب دونوں اوپنرز گولڈن ڈک پر آؤٹ ہوئے۔ آخر کار بھارت 9 وکٹوں پر 153 رنز تک محدود رہا۔ جے مونڈرا اور میٹ ہالرڈ نے 3، 3 وکٹیں حاصل کیں۔ ہیری ٹیکٹر کو میچ کا بہترین کھلاڑی قرار دیا گیا۔
