ماسکو(انٹرنیشنل ڈیسک)
ڈیلاس کی نمی سے بھری دوپہر میں کرستیانو رونالڈو کے شاندار ورلڈ کپ کیریئر کا پردہ گر گیا، جب پرتگال کو راؤنڈ آف 16 میں سپین نے اسٹاپیج ٹائم میں 1-0 سے شکست دے دی۔ پیر کو کھیلے گئے اس میچ کے ساتھ ہی فٹ بال کے اس عظیم کھلاڑی نے عالمی ٹورنامنٹ میں اپنے ملک کے لیے آخری بار میدان میں قدم رکھا، جہاں انہوں نے چھ مختلف ایڈیشنز میں اپنی موجودگی کے جوہر دکھائے۔ 41 سالہ رونالڈو نے میچ کے بعد کہا کہ “میں نے اپنی پوری توانائی لگا دی۔ میں نے اپنی بہترین کارکردگی کا مظاہرہ کیا، اور میں صاف ضمیر کے ساتھ جارہا ہوں۔ جی ہاں، یہ میرا آخری ورلڈ کپ تھا، لیکن اب میرے پاس وقت ہوگا کہ میں سوچ بچار کروں اور اپنے خاندان کے ساتھ وقت گزاروں۔ میں کوئی جلدی فیصلہ نہیں کروں گا۔”
انہوں نے اس بات کی واضح طور پر تصدیق نہیں کی کہ آیا انہوں نے پرتگال کے لیے اپنا آخری میچ کھیلا ہے، اور کہا کہ وہ نہیں چاہتے کہ کوئی ذاتی فیصلہ ٹیم کی مہم پر سایہ ڈالے۔ رونالڈو نے ڈیلاس اسٹیڈیم میں ایک آخری بار نظریں دوڑائیں، آنسوؤں کو روکتے ہوئے شائقین کو داد دی، اور پھر آہستہ آہستہ کیپٹن کا بازوبند اپنے ہاتھ میں دبائے آخری بار لاکر روم کی طرف روانہ ہوگئے۔ اگرچہ وہ کبھی ورلڈ کپ ٹرافی اٹھائے بغیر ہی الوداع کہہ رہے ہیں، لیکن رونالڈو ان چند کھلاڑیوں میں سے ایک ہیں جن کا کیریئر اتنا شاندار رہا ہے۔
