بئیرسٹو کی شاندار اننگز، یارکشائر ایک وکٹ سے کامیاب

ماسکو (انٹرنیشنل ڈیسک)

یارکشائر نے ناٹنگھم شائر کو سنسنی خیز مقابلے میں ایک وکٹ سے شکست دے کر روتھےسے کاؤنٹی چیمپئن شپ سیزن کا اختتام مسلسل تیسری فتح کے ساتھ کیا۔ ٹرینٹ برج میں کھیلے گئے میچ میں یارکشائر نے 158 رنز کا ہدف 9 وکٹوں کے نقصان پر حاصل کرلیا۔ ناٹنگھم شائر نے پہلی اننگز میں 251 رنز بنائے تھے، جس کے جواب میں یارکشائر کی ٹیم 179 رنز پر آؤٹ ہوگئی۔ ناٹنگھم شائر کی دوسری اننگز انتہائی تباہ کن ثابت ہوئی اور پوری ٹیم صرف 85 رنز پر ڈھیر ہوگئی، یوں یارکشائر کو فتح کے لیے 158 رنز کا ہدف ملا۔ ناٹنگھم شائر نے دن کا آغاز 55 رنز پر 3 وکٹوں سے کیا تھا، تاہم یارکشائر کے بولرز نے صرف 30 رنز کے اضافے پر اس کی مزید سات وکٹیں حاصل کرلیں۔ جیک وائٹ نے شاندار بولنگ کرتے ہوئے 23 رنز کے عوض 5 وکٹیں حاصل کیں، جبکہ بین کوڈ نے 27 رنز دے کر 4 کھلاڑیوں کو آؤٹ کیا۔

158 رنز کے ہدف کے تعاقب میں یارکشائر کی جانب سے ول لکسٹن نے 53 رنز کی عمدہ اننگز کھیلی اور ایک موقع پر ٹیم کی پوزیشن مستحکم دکھائی دے رہی تھی۔ تاہم لیام پیٹرسن وائٹ اور پاکستانی فاسٹ بولر محمد علی نے یارکشائر کے خلاف زبردست واپسی کرتے ہوئے اس کی سات وکٹیں صرف 61 رنز کے اندر حاصل کرلیں۔
محمد علی نے یارکشائر کے اہم کھلاڑیوں کو پویلین بھیج کر اپنی ٹیم کو فتح کے قریب پہنچا دیا، تاہم یارکشائر کے کپتان جونی بئیرسٹو نے ذمہ داری سنبھال لی۔ بئیرسٹو نے 38 رنز کی ناقابل شکست اننگز کھیلی اور محمد علی کی گیند پر کور کے اوپر سے چھکا لگا کر یارکشائر کو ایک وکٹ سے فتح دلا دی۔

بئیرسٹو نے اپنی فیصلہ کن اننگز کے دوران محمد علی کے ایک اوور میں دو چوکے اور ایک چھکا بھی لگایا، جس کے بعد اگلے اوور میں چار گیندیں مس کرنے کے باوجود وہ آخرکار ٹیم کو فتح تک پہنچانے میں کامیاب رہے۔ ناٹنگھم شائر کی جانب سے محمد علی نے مجموعی طور پر 3 وکٹیں حاصل کیں جبکہ لیام پیٹرسن وائٹ نے 4 کھلاڑیوں کو آؤٹ کیا۔ ناٹنگھم شائر کے وکٹ کیپر مچل ہے نے میچ میں سات کیچز مکمل کیے، جو کاؤنٹی کی فرسٹ کلاس وکٹ کیپنگ تاریخ کے ریکارڈ کے برابر ہے۔ ناٹنگھم شائر، جو 2025 کی چیمپئن تھی، رواں سیزن میں چوتھی پوزیشن پر رہی جبکہ یارکشائر نے پانچویں پوزیشن حاصل کی۔