ماسکو(انٹرنیشنل ڈیسک)
روسی کراسنودر ٹیریٹری میں کلونڈ گائے زویزدوچکا نے اپنی پہلی اولاد کو جنم دیا ہے۔ اس واقعے سے ثابت ہوا ہے کہ کلونڈ جانور بھی قدرتی طور پر نسل بڑھا سکتے ہیں۔
پروگریس ایگرو گروپ نے جمعرات کو بتایا کہ “بیوٹیکنالوجسٹ اسے اہم تصدیق قرار دے رہے ہیں کہ کلونڈ گائے زویزدوچکا نے قدرتی طور پر صحت مند اولاد کو جنم دیا ہے۔ Ust-Labinsk ضلع میں پیدا ہونے والی بچھڑی کا نام دارینا رکھا گیا ہے اور اس کا وزن 39 کلوگرام ہے۔”
کمپنی نے واضح کیا کہ زویزدوچکا کی حمل اور ڈیلیوری بغیر کسی پیچیدگی کے مکمل ہوئی اور بچھڑی اپنے ہم عمر بچھڑیوں کی طرح صحت مند اور نارمل رفتار سے نشوونما پا رہی ہے۔
زویزدوچکا خود ایک ریکارڈ دودھ دینے والی گائے کی عین جینیاتی نقل ہے جو ایک لیکٹیشن میں 18 ٹن دودھ دیتی تھی۔ کمپنی کا کہنا ہے کہ زویزدوچکا کا دودھ لیبارٹری ٹیسٹ پاس کر چکا ہے، جو اعلیٰ معیار پر پورا اترتا ہے اور عام گائے کے دودھ جیسا ہی ذائقہ رکھتا ہے۔ اس کی پیداواری صلاحیت بھی اپنی ماں کے برابر پہنچ چکی ہے۔
صحت مند اولاد کی پیدائش سے ثابت ہوا ہے کہ کلونڈ جانور مکمل طور پر نسل بڑھانے کی صلاحیت رکھتے ہیں۔ اس تجربے کے نتائج قیمتی جینیاتی اقسام کو محفوظ کرنے میں مددگار ثابت ہوں گے۔ پروگریس ایگرو کے چیف ایگزیکٹو آفیسر ڈینس سرپتسکی نے کہا کہ یہ ترقیات کمپنی کو اپنے جینیاتی پروگرام کو مزید آگے بڑھانے اور ریوڑ کے معیار کو بہتر بنانے میں مدد دیں گی۔
کمپنی نے یہ بھی بتایا کہ زویزدوچکا کے کئی سو کلونڈ ایمبریوز اس کے کریوبینک میں محفوظ ہیں اور سائنسدان اس وقت دو اعلیٰ نسل کے بیلوں کی کلوننگ پر بھی کام کر رہے ہیں۔
