اسلام آباد (صداۓ روس)
پاکستان بھر میں عید الاضحیٰ کے دوسرے دن بھی مذہبی جوش و جذبے کے ساتھ منایا جا رہا ہے۔ مسلمان سنت ابراہیمی کی پیروی کرتے ہوئے جانوروں کی قربانی میں مصروف ہیں۔ پہلے دن کے مقابلے میں دوسرے دن قربانیوں میں نمایاں کمی دیکھی جا رہی ہے۔
عید کے دوسرے دن بھی ضلعی انتظامیہ فعال ہے۔ صفائی کے کارکن جگہ جگہ نظر آ رہے ہیں اور گلی محلوں سے آلائشوں کو اٹھانے کا کام جاری ہے۔ قانون نافذ کرنے والے اداروں کے اہلکار حفاظتی اقدامات میں مصروف ہیں۔
بڑے شہروں میں سڑکوں پر رش کم ہے کیونکہ بہت سے لوگ آبائی گھروں کو چلے گئے ہیں۔ بچوں کے اصرار پر قربانی کے بعد رشتہ داروں کے گھروں اور پارکوں کا رخ کیا جا رہا ہے۔ نوجوانوں کے سیر و تفریح اور دعوتوں کے پروگرام بن رہے ہیں۔
گھروں میں لذیذ پکوان تیار ہو رہے ہیں جن سے مہمانوں کی تواضع کی جا رہی ہے۔ بچے جھولوں اور سیر سپاٹے کا لطف اٹھا رہے ہیں۔ خواتین کا زیادہ تر وقت گوشت کی تقسیم اور گھریلو امور میں گزر رہا ہے جبکہ بزرگ دوستوں کی منڈلیاں لگائے مختلف دلچسپیوں میں مشغول ہیں۔
