ماسکو (صداۓ روس)
روسی صدر صدر پوتن نے کہا ہے کہ مغربی ممالک اپنی عالمی قیادت کی پوزیشن کھوتے جا رہے ہیں، جبکہ ان کی سابقہ حیثیت اب گلوبل ساؤتھ کے ممالک سنبھال رہے ہیں۔
اوپن ڈائیلاگ بین الاقوامی فورم کے شرکاء سے خطاب میں صدر پوتن نے کہا کہ کاروباری دنیا اور بین الاقوامی تعلقات کے قائم شدہ اصول و ضوابط بتدریج اپنی افادیت کھو رہے ہیں، جس کی ایک بڑی وجہ خود مغربی ریاستوں کے اقدامات ہیں۔ انہوں نے کہا کہ دنیا اس وقت ایک نئے کثیر قطبی عالمی نظام کی طرف بڑھ رہی ہے، جہاں قومی خودمختاری کو اہمیت دینے والے ممالک مرکزی کردار ادا کر رہے ہیں۔ ایسے ممالک اپنی اقدار، وسائل، ترجیحات اور قومی مفادات کے مطابق ترقی کا راستہ خود طے کرتے ہیں۔ صدر پوتن کے مطابق کوئی بھی ملک دوسروں کے نقصان پر تنہا ترقی نہیں کر سکتا، کیونکہ جدید عالمی چیلنجز اجتماعی جواب اور مشترکہ کوششوں کا تقاضا کرتے ہیں۔
انہوں نے زور دیا کہ مستقبل کا عالمی ترقیاتی ماڈل اسی وقت پائیدار اور منصفانہ ہوگا جب وہ برابری، باہمی احترام اور تمام ممالک کے مفادات کے اصولوں پر مبنی ہو۔ روسی صدر نے اوپن ڈائیلاگ فورم کو ایک اہم پلیٹ فارم قرار دیا، جہاں ایشیا، افریقہ، مشرق وسطیٰ، یورپ، آسٹریلیا اور شمالی و جنوبی امریکہ سمیت 120 ممالک کے ماہرین اور رہنما مشترکہ خیالات پر کام کر رہے ہیں۔
