ماسکو(انٹرنیشنل ڈیسک)
جنوبی کوریا کی فوج نے دعویٰ کیا ہے کہ شمالی کوریا نے پیر کے روز بحیرہ جاپان کی جانب متعدد بیلسٹک میزائل داغے ہیں۔ نیوز ون نے جنوبی کوریا کے جوائنٹ چیفس آف اسٹاف کے حوالے سے یہ اطلاع دی۔ رپورٹ کے مطابق میزائل مقامی وقت کے مطابق صبح تقریباً 9:20 بجے (جی ایم ٹی صبح 12:20 بجے) پیانگ یانگ کے قریب کے علاقے سے داغے گئے اور تقریباً 900 کلومیٹر تک پرواز کی۔ جنوبی کوریائی فوج کسی بھی مزید لانچ کے لیے تیار ہے اور امریکہ و جاپان کے ساتھ معلومات کا تبادلہ کر رہی ہے۔ اس سے قبل سیول نے بتایا تھا کہ شمالی کوریا کی جانب سے ایک نامعلوم پروجیکٹائل داغا گیا ہے۔ شمالی کوریا نے آخری بار 3 اکتوبر کو بیلسٹک میزائل کا تجربہ کیا تھا۔ وہ پروجیکٹائل بحیرہ جاپان کی جانب ونسان کے علاقے سے داغا گیا تھا۔
