ماسکو (صداۓ روس)
امریکی صدر ڈونلڈ ٹرمپ نے کہا ہے کہ امریکا بدستور روس اور یوکرین دونوں پر زور دے رہا ہے کہ وہ جنگ کے خاتمے اور پائیدار امن کے قیام کے لیے ضروری سمجھوتے کریں۔ وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ وہ چاہتے ہیں کہ روسی صدر Vladimir Putin اور یوکرینی صدر Volodymyr Zelenskyy دونوں کچھ نہ کچھ رعایتیں دیں تاکہ تنازع کے حل کی راہ ہموار ہو سکے۔ انہوں نے کہا، ’’میں چاہتا ہوں کہ دونوں فریق کچھ مخصوص سمجھوتے کریں، اور میرا خیال ہے کہ وہ ایسا کریں گے۔‘ امریکی صدر نے اس موقع پر ممکنہ سمجھوتوں یا امن مذاکرات کی تفصیلات بیان نہیں کیں، تاہم ان کا کہنا تھا کہ واشنگٹن روس اور یوکرین کے درمیان جنگ کے خاتمے کے لیے سفارتی کوششوں کی حمایت جاری رکھے ہوئے ہے۔
روس اور یوکرین کے درمیان جاری تنازع کے باعث خطے میں سلامتی کی صورتحال بدستور کشیدہ ہے، جبکہ عالمی برادری جنگ بندی اور مذاکرات کے ذریعے مسئلے کے حل پر زور دے رہی ہے۔
