روس یورپ کا حصہ ہے، اسے نقشے سے مٹایا نہیں جا سکتا، سربراہ روسی سینیٹ

ماسکو (صداۓ روس)

روسی فیڈریشن کونسل کی اسپیکر ویلنٹینا ماتویینکو نے کہا ہے کہ روس ماضی میں بھی یورپ کا حصہ تھا، آج بھی ہے اور مستقبل میں بھی رہے گا، جبکہ اسے عالمی نقشے سے الگ یا مٹانا ناممکن ہے۔ St. Petersburg International Economic Forum 2026 کے موقع پر ایک انٹرویو میں ویلینتینا ماتویینکو نے یورپی ممالک کے ساتھ تعلقات کے مستقبل پر بات کرتے ہوئے کہا کہ روس کو تنہا نہیں کیا جا سکتا کیونکہ روس اور یورپ ہمسایہ ہیں اور دونوں کو بالآخر معمول کے تعلقات اور اچھے ہمسایہ روابط بحال کرنا ہوں گے۔ انہوں نے کہا کہ روس اور یورپی ممالک کے درمیان تعاون کے وسیع امکانات موجود ہیں اور اقتصادی، سائنسی، ثقافتی اور انسانی شعبوں میں دوبارہ شراکت داری قائم کی جا سکتی ہے، بشرطیکہ دونوں جانب سیاسی عزم اور نیک نیتی موجود ہو۔ ماتویینکو نے خاص طور پر جرمن کمپنیوں کا ذکر کرتے ہوئے کہا کہ ماضی میں کئی جرمن کاروباری ادارے روسی منڈی میں کامیابی سے کام کر رہے تھے، تاہم سیاسی فیصلوں کے باعث انہیں روس چھوڑنا پڑا۔ ان کے بقول روس مخالف جذبات اور روس کو جغرافیائی سیاسی طور پر کمزور کرنے کی کوششوں سے قبل ماسکو اور یورپی ممالک کے درمیان توانائی، ہائی ٹیکنالوجی، ثقافت اور انسانی روابط کے شعبوں میں مضبوط تعاون موجود تھا۔ روسی سینیٹ کی سربراہ کا کہنا تھا کہ یورپ اور روس کے درمیان تعلقات کی بحالی نہ صرف ممکن ہے بلکہ دونوں فریقوں کے مفاد میں بھی ہے۔