مولدووا کے علیحدہ ریجن میں دہشتگردانہ حملہ، روس کا اظہار تشویش
ماسکو(صداۓ روس)
پیر سے شروع ہونے والے دہشت گردانہ حملوں کےایک سلسلے نے مولدووا سے الگ ہونے والے علاقے ٹرانسنسٹریا کو متاثر کیا ہے. جسے سرکاری طور پر پرڈنیسٹروین مالدوین ریپبلک (PMR) کہا جاتا ہے، جو یوکرین کی سرحد سے متصل ہے. آر آئی اے نووستی نے صدر کی ویب سائٹ کا حوالہ دیتے ہوئے رپورٹ کیا کہ ٹرانس نسٹریا کے صدر وادیم کراسنوسلسکی نے ریجن میں دہشت گردی کے بعد الرٹ جاری کردیا ہے. ریجن کی وزارت داخلہ نے بتایا کہ یکے بعد دیگرے دو دھماکوں نے منگل کی صبح مایاک گاؤں میں ایک نشریاتی مرکز کو ہلا کر رکھ دیا۔ جاری بیان میں مزید کہا گیا کہ کسی کو کوئی نقصان نہیں پہنچا، لیکن دو سب سے بڑے اینٹینا، جو روسی ریڈیو اسٹیشنوں کو نشر کر رہے تھے، کو غیر فعال کر دیا گیا ہے۔ ایک اور واقعہ پارکنی گاؤں کے قریب ایک فوجی مقام پر پیش آیا۔ سوشل میڈیا پر پیر کو سامنے آنے والی رپورٹس میں کہا گیا ہے کہ دو دھماکے ہوئے ہیں۔
وزارت داخلہ کے مطابق پیر کو بھی خطے کے دارالحکومت تراسپول میں قومی سلامتی کی وزارت کی عمارت پر راکٹ سے چلنے والے دستی بموں سے شیلنگ کی گئی، لیکن اس میں کوئی جانی نقصان نہیں ہوا۔ مالدووان صدر مایا سانڈو آج اس معاملے پر بحث کے لیے ملک کی سپریم سیکیورٹی کونسل کا اجلاس طلب کریں گے۔ یاد رہے زیادہ تر روسی بولنے والوں کا مسکن علاقہ ٹرانسنیسٹریا یکطرفہ طور پر مالدووا سے الگ ہو گیا تھا کیونکہ سوویت یونین ٹوٹ گیا تھا۔ یہ علاقہ اب مولدووا سے علیحدہ ہے اور روس کی ایک امن فوج 1990 کی دہائی کے اوائل سے وہاں تعینات ہے۔