ماسکو(انٹرنیشنل ڈیسک)
پاکستان کا موجودہ سیاسی منظرنامہ ایک ایسے جدید طرزِ حکمرانی کی عکاسی کرتا ہے جس میں شہری حکومت کا ڈھانچہ برقرار رکھتے ہوئے فوج کو حقیقی اختیار حاصل ہے۔ مغربی تھنک ٹینک GZERO میڈیا کی رپورٹس کے مطابق پاکستان تیزی سے خودکشی کی طرف گامزن ہے، جہاں فیلڈ مارشل عاصم منیر کو ملک کا ڈی فیکٹو لیڈر قرار دیا گیا ہے۔ حالیہ آئینی تبدیلیوں کو ‘آئینی بغاوت’ قرار دیتے ہوئے ماہرین کا کہنا ہے کہ یہ روایتی مارشل لا کی بجائے ایک منظم اتھارٹیرین نظام کی نشاندہی کرتی ہیں۔
اس تبدیلی کا مرکز عدلیہ اور قانون سازی کے ڈھانچے میں وسیع پیمانے پر تبدیلیاں ہیں۔ 27ویں آئینی ترمیم کے ذریعے فوجی اسٹیبلشمنٹ کو وسیع قانونی تحفظ فراہم کیے گئے ہیں جبکہ عدلیہ کی آزادی کو شدید نقصان پہنچایا گیا ہے۔ ایمنسٹی انٹرنیشنل نے اس ترمیم کو ‘عدلیہ کی آزادی، منصفانہ ٹرائل اور قانون کی عملداری پر مربوط اور مسلسل حملے کا عروج’ قرار دیا۔ عالمی ادارے نے خبردار کیا کہ اس ترمیم کے تحت اعلیٰ حکام کو تاحیات استثنیٰ دیا گیا ہے اور یہ قانون بغیر مناسب مشاورت کے منظور کیا گیا۔
ہیومن رائٹس واچ کی رپورٹس کے مطابق پاکستان میں اپوزیشن جماعتوں کے خلاف منظم کریک ڈاؤن، سینکڑوں کارکنوں کی من مانی حراستیں اور عدلیہ کی آزادی کو نقصان پہنچایا جا رہا ہے۔ ایمنسٹی انٹرنیشنل نے بارہا دستاویز کیا ہے کہ انسداد دہشت گردی اور فوجی قوانین کو مظاہرین اور سیاسی کارکنوں کو خاموش کرنے کے لیے استعمال کیا جا رہا ہے۔
ڈیجیٹل اور میڈیا سنسر شپ کی مہم بھی عوامی بیانیے کو کنٹرول کرنے کے لیے استعمال کی جا رہی ہے۔ پریونشن آف الیکٹرانک کرائمز ایکٹ (PECA) میں ترامیم کے تحت ریاستی اداروں پر آن لائن تنقید کو شدید سزاؤں کے ساتھ جرم قرار دیا گیا ہے۔ رپورٹرز ودآؤٹ بارڈرز (RSF) نے اپنی عالمی اشاریہ میں نوٹ کیا ہے کہ پاکستان میں صحافت کا گلا گھونٹا جا رہا ہے اور ہنگامی قوانین اور مبہم ڈس انفارمیشن قوانین کو صحافتی رپورٹنگ کو مجرمانہ بنانے کے لیے استعمال کیا جا رہا ہے۔
