مشکل گھڑی میں روس کا ساتھ دیں گے، چین

ماسکو: اشتیاق ہمدانی
چینی وزیر خارجہ وانگ یی نے اپنے روسی ہم منصب سرگئی لاوروف کو فون پر بات چیت کے دوران بتایا کہ چین نے روس کی حمایت کرنے کا وعدہ کیا ہے کیونکہ اسے مغرب کی جانب سے مشترکہ خطرات کا سامنا ہے. چینی وزیر خارجہ نے کہا کہ مغربی ممالک کی جانب سے بڑھتے ہوئے خطرات کے پیش نظردونوں ممالک کے حکام نے اپنی جغرافیائی سیاسی کوششوں میں ایک دوسرے کا ساتھ دینے کا عزم کیا ہے۔ چینی وزارت خارجہ کی طرف سے پوسٹ کردہ ریڈ آؤٹ کے مطابق بیجنگ روس کی مضبوطی سے حمایت کرے گا اور روسی صدر ولادیمیر پوتن کی “مشکلات پر قابو پانے اور خلفشار کو ختم کرنے کے لیے روسی عوام کو متحد کرنے اور ان کی رہنمائی کرنے کی کوششوں میں مدد کرے گا. چینی اعلی سفارتکار نے کہا کہ اس کے علاوہ چین اسٹریٹجک ترقی کے اہداف کو حاصل کرنے کے لیے اور بین الاقوامی سطح پر روس کو ایک بڑی طاقت بننے کے لئے تقویت دے گا۔

اس گفتگو کے دوران ممالک کے اعلیٰ سفارت کاروں نے اپنے باہمی اعتماد اور ایک دوسرے کی پختہ حمایت کا اعادہ کیا اور اپنے دونوں ممالک کو اس طرح اگلی سطح پر لے جانے کے لیے مل کر کام کرنے کے عزم کا اظہار کیا جس سے نہ صرف دونوں ممالک کو فائدہ پہنچے بلکہ دنیا میں خراب ہوتی صورت حال میں مزید استحکام ملے گا.