غزہ جنگ ختم کروا سکتے ہیں، روسی صدر کا اسرائیلی وزیراعظم کو فون
ماسکو (صداۓ روس)
کریملن پریس سروس نے اسرائیلی وزیر اعظم بنجمن نیتن یاہو کے ساتھ ان کی فون کال کے بعد کہا کہ روسی صدر ولادیمیر پوتن نے غزہ کی پٹی کی صورتحال کو پرامن کرنے میں مدد کے لیے روس کی تیاری کا اظہار کیا ہے۔ پریس سروس میں کہا گیا ہے کہ روس شہریوں کی تکالیف کو دور کرنے اور تنازعہ کو کم کرنے کے لیے ہر ممکن مدد کی پیشکش کے لیے تیار ہے۔ اس کے علاوہ فریقین نے روسی شہریوں اور ان کے خاندان کے افراد کے انخلاء کے ساتھ ساتھ غزہ میں یرغمال بنائے گئے اسرائیلیوں کی رہائی کے معاملات پر تعاون جاری رکھنے کے لیے باہمی آمادگی کا اظہار کیا۔
کریملن نے مزید کہا کہ دونوں ممالک کے رہنماؤں نے مشرق وسطیٰ کی صورت حال کے پیش نظر رابطے جاری رکھنے پر بھی اتفاق کیا۔ واضح رہے اس ہفتے کے شروع میں روسی صدر کی سعودی ولی عہد اور متحدہ عرب امارات، ایران اور مصر کے صدور کے ساتھ بات چیت کے دوران فلسطین اسرائیل تنازعہ کے زون کی صورتحال مرکزی موضوعات میں شامل تھی۔